Klinika sahibi yenidən Ali Məhkəməyə müraciət etdi

Mənimsəmə, sənəd saxtalaşdırılması və vergidən yayınmada ittiham olunan “Medi Sina” klinikasının sahibi Muğdət Həşimov yenidən kasasiya şikayəti verib.

Ali Məhkəmədən Teleqraf.com-a verilən məlumata görə, Müğdət Həşimovun kasasiya şikayəti hakim Tahir Kazımovun icraatına verilib.

Məhkəmə baxışı sentyabrın 5-ə təyin edilib.

Qeyd edək ki, bir neçə ay əvvəl də Müğdət Həşimov kasasiya şikayəti ilə Ali Məhkəməyə müraciət edib. Həmin dövrdə hakim Tahir Kazımovun sədrliyi ilə baş tutan prosesdə təqsirləndirilən şəxsin məhkəməyə ünvaladığı ərizəsi elan edilib.

Təqsirləndirilən şəxs məhkəməyə ərizəsində şikayətini geri götürdüyünü qeyd edib. Hakim heyəti Müğdət Həşimovun imtina ərizəsini təmin edib. Onun verdiyi kasasiya şikayətinin məhkəmə baxışından çıxarılıb və iş materialları apelyasiya instansiyasına qaytarılıb.

Bakı Ağır Cinayətlər Məhkəməsinin hökmü ilə Müğdət Həşimov 9 il azadlıqdan məhrum olunub. Məhkəmə onun ittiham olunduğu Cinayət Məcəlləsinin 213-cü (vergidən yayınma) maddəsinə xitam verib.

Hökmdən narazı qalan Müğdət Həşimov və onun vəkili apelyasiya şikayəti verib. Müdafiə tərəfi birinci instansiya məhkəməsinin hökmünün ləğvini və bəraət hökmünün çıxarılmasını istəyib.

Həmçinin zərərçəkmiş Ramazan Zeynalov da apelyasiya şikayəti verərək, təqsirləndirilən şəxsin cəzasının ağırlaşdırılmasını istəyib.

Bakı Apelyasiya Məhkəməsinin qərarı ilə Müğdət Həşimovun və zərərçəkmişin apelyasiya şikayəti təmin edilməyib. Bu qərardan narazı qalan təqsirləndirilən şəxs kasasiya şikayəti ilə Ali Məhkəməyə müraciət edib.

İttihama görə, Müğdət Həşimov iş adamı Ramazan Zeynalova qarşı (Hacı Mazan) 163 min manatlıq dələduzluq edib. Ramazan Zeynalov müqavilə əsasında klinikanın yerləşdiyi binanı Müğdət Həşimova icarəyə verib, ancaq icarə haqqını ala bilməyib.

Bundan başqa, Müğdət Həşimov vergi ödəməkdən boyun qaçırıb və külli miqdarda dövlət vəsaitini mənimsəyib.

Xatırladaq ki, Bakı Slavyan Universitetinin Yaradıcılıq fakültəsinin dekanı, tənqidçi Elnarə Tofiqqızı adı çəkilən klinikada əməliyyat zamanı vəfat edib. “Medi Sina” klinikasının Səhiyyə Nazirliyindən lisenziya almadığı halda onkoloji əməliyyatın keçirilməsinə razı olmaqla ölümə şərait yaratdığı əsas gətirilərək, klinikaya qarşı cinayət işinin qaldırılmasına qərar verilib və Baş Prokurorluğa təqdimat göndərilib.

“Medi Sina” klinikasının bütün əmlakına həbs qoyulub.

Bundan başqa, Ali Məhkəmə zərərçəkən tərəfə mənəvi təzminat ödənilməsi barədə də qərar qəbul edib. İddiaçı tərəfin maddi təzminatla bağlı tələbini də Ali Məhkəmə 2 mart 2018-ci ildə təmin edib və "Medi Sina" klinikası da daxil olmaqla, cavabdehlərdən birdəfəlik 9,800 manat, həmçinin Elnarə Tofiqqızının övladlarının 18 yaşına çatana qədər hər birinə 136 manat (ali məktəbə girəcəkləri təqdirdə 23 yaşa qədər) məbləğində aylıq müavinət ödənilməsinə qərar verib.

Ali Məhkəmənin qərarına uyğun olaraq, iddiaçılar Yasamal rayon Məhkəməsinə təzminatla bağlı daha bir müraciət ünvanlayıblar.