Binədəki dəhşətli qəza ilə bağlı cinayət işi açıldı - Yeniləndi

Binə qəsəbəsində dəhşətli qəzaya səbəb olan 160 saylı avtobosun sürücüsü şübhəli şəxs qismində saxlanılıb.

Teleqraf.com xəbər verir ki, 1983-cü il təvəllüdlü Elxan Şirəliyev sağ qolun sınığı diaqnozu ilə xəstəxanaya yerləşdirilib.

O, xəstəxanada polis nəzarətində saxlanılır.

****

Bakıda sərnişin avtobusunun qatarla toqquşması ilə bağlı cinayət işi başlanıb.

Teleqraf.com xəbər verir ki, faktla bağlı Daxili İşlər Nazirliyinin Baş Nəqliyyat İdarəsində Cinayət Məcəlləsinin 263.2-ci (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) maddəsilə cinayət işi açılıb, istintaq hərəkətləri aparılır.

Bu gün 14.35-də 160 nömrəli müntəzəm marşrut xətti üzrə hərəkət edən "10-TG-106" dövlət qeydiyyat nişanlı sərnişin avtobusu Xəzər rayonu, Binə qəsəbəsində hərəkətdə olan qatarla toqquşub. Qəza həmin ərazidəki qorunan dəmiryolu keçidində baş verib.

Hadisə nəticəsində 1 nəfər azyaşlı dünyasını dəyişib, 33 nəfər isə xəstəxanalara yerləşdirilib.

Xəsarət alanlardan 5-i azyaşlıdır.