Bakıda əməliyyat: 10 kilo narkotik dövriyyədən çıxarıldı

Bakıda polis əməkdaşlarının keçirdikləri əməliyyat tədbirləri nəticəsində 10 kiloqramdan artıq narkotik vasitə aşkar edilərək götürülüb.

Daxili İşlər Nazirliyinin mətbuat xidmətindən Teleqraf.com-a daxil olan məlumata görə, Nərimanov rayon Polis İdarəsinin 18-ci polis şöbəsi əməkdaşlarının keçirdikləri əməliyyat tədbirləri nəticəsində narkotiklərin qanunsuz dövriyyəsində şübhəli bilinən Şəki şəhər sakini, əvvəllər məhkum olunmuş Sadiq Şabanov saxlanılıb.

Ondan çəkisi 8 kiloqram 200 qram olan marixuana götürülüb.

Bundan başqa, Qaradağ rayon Polis İdarəsinin 11-ci polis bölməsi əməkdaşlarının keçirdikləri tədbirlər nəticəsində isə Bakı şəhər sakini Eldəniz Əhmədovdan çəkisi 2 kiloqramdan artıq marixuana götürülüb.

Hər iki faktla bağlı cinayət işi başlanıb.