17 İyul 17:30
260

Rüşvət almaqda təqsirləndirilən amerikapress.com saytının rəhbəri, İşgəncələrə qarşı Azərbaycan Komitəsinin sədr müavini, hüquq müdafiəçisi Rauf Sultanovun kasasiya şikayətinə baxılıb.

Teleqraf.com xəbər verir ki, Ali Məhkəmədə hakim İmran Hacıqayıbovun sədrliyi ilə baş tutan prosesdə qərar elan edib.

Qərara görə, Rauf Sultanovun bəraət istəməsi barədə verdiyi şikayət təmin olunmayıb.

Bakı Ağır Cinayətlər Məhkəməsinin hökmü ilə Rauf Sultanov 3 il müddətinə azadlıqdan məhrum edilib.

Bakı Apelyasiya Məhkəməsinin qərarı ilə onun şikayəti təmin olunmayıb.

İstintaq orqanı tərəfindən Rauf Sultanov barəsində Cinayət Məcəlləsinin 311-ci (rüşvət alma) maddəsi ilə ittiham versə də, Bakı Ağır Cinayətlər Məhkəməsinin hökmü ilə onun əməli Cinayət Məcəlləsinin 182.1-ci (hədə-qorxu yolu ilə tələb etmə) maddəsinə tövsüf edilib.

İttihama görə, Baş prokuror yanında Korrupsiyaya Qarşı Mübarizə İdarəsinin əməkdaşları keçirdiyi əməliyyat nəticəsində Rauf Sultanov yaşadığı evdə pul alarkən yaxalanıb.

O, 187 saylı orta məktəbin direktoru Nailə Məmmədovadan rüşvət almaqda təqsirli bilinib.

Rauf Sultanov dələduzluqda təqsirləndirilərək əvvəllər məhkumluq həyatı yaşayıb.

Bundan əvvəl o, Cinayət Məcəlləsinin 178.2.4-cü (dələduzluq) maddəsi ilə ittiham edilib.

Anadangəlmə epilepsiya xəstəsi olan 1-ci qrup əlil Rauf Sultanov mobil telefonların alqı-satqısı ilə məşğul olduğunu, ilkin dindirmə zamanı xəstəliyi ilə əlaqədar borcunu gecikdirdiyini deyib.

Rauf Sultanov 2012-ci ildə Təhsil Nazirliyinin qarşısında keçirilən aksiya zamanı polisə müqavimət göstərib və Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə məhkum olunub. Hökm üzrə Rauf Sultanov ötən ilin dekabrın 2-də cəzasını başa vurub.

Xəzər rayon Məhkəməsinin hökmü ilə Rauf Sultanovun barəsində 3 il 2 ay müddətinə azadlıqdan məhrumetmə cəzası təyin edib.

Hökmdən narazı qalan Rauf Sultanov apelyasiya şikayəti verib. O, şikayətində qeyd edib ki, hökmdə yenə də xətşünaslıq ekspertizasının rəyi saxtalaşdırılıb. Rauf Sultanov barəsində çıxarılan hökmün ləğv edilməsini və bəraət verilməsini xahiş edib. Həmçinin Baş Prokurorluq da apelyasiya protesti verərək, Rauf Sultanovun cəzasının ağırlaşdırılmasını istəyib.

Bakı Apelyasiya Məhkəməsinin qərarı ilə Xəzər rayon Məhkəməsinin hökmü dəyişdirilib. Rauf Sultanovun ittiham olunduğu Cinayət Məcəlləsinin 178.2.4-cü maddəsi həmin məcəllənin 178.1 və 178.2-ci maddələrinə tövsüf edilib və onun barəsində 3 il 2 ay müddətinə azadlıqdan məhrum etmə cəzası qüvvəsində saxlanılıb.

Rauf Sultanov sonradan Nizami rayon Məhkəməsinin qərarı ilə vaxtından əvvəl azadlığa buraxılıb.

Hüquq müdafiəçisi olan Rauf Sultanov azadlığa çıxandan sonra Amerkapress.com saytını yaradıb və həmin sayta rəhbərlik edib.

Sayt rəhbəri olandan sonra onun barəsində hüquq-mühafizə orqanlarına şikayətlər daxil olub.

Qeyd edək ki, 17 saylı cəza çəkmə müəssisəsində saxlanılan Rauf Sultanov barəsində “Azərbaycan Respublikasının Cinayət Məcəlləsində dəyişikliklər edilməsi haqqında” 20 oktyabr 2017-ci il tarixli Qanununun tətbiq edilməsini barədə ərizəsi Xəzər rayon Məhkəməsində araşdırılıb və təmin olunmayıb.

Bu qərardan narazı qalan Rauf Sultanov apelyasiya şikayəti verib.

O, şikayətində qeyd edib ki, şantaj etməkə təqsirli bilinərək məhkum olunsa da, onun işi üzrə zərərçəkmiş şəxs tanınmayıb.

Rauf Sultanov apelyasiya şikayətində işində zərərçəkmişin tanınmaması ilə bağlı məsələnin araşdırılmasını istəyib. O, həmçinin cəzadan vaxtından əvvəl azdalığa buraxılmasını da xahiş edib.

Rauf Sultanovun şikayəti araşdırılması üçün Bakı Apelyasiya Məhkəməsinə göndərilib.

Şikayət araşdırılması üçün hakim Rizvan Səfərovun sədrliyi ilə baxılıb və təmin edilməməsi barədə qərar qəbul edilib.

Bu qərardan narazı qalan Rauf Sultanov kasasiya şikayəti verib. Onun kasasiya şikayətinə Ali Məhkəmədə hakim Tahir Kazımovun sədrlik etdiyi kollegiyada baxılacaq.

Kasasiya şikayətinin araşdırılması üçün məhkəmənin vaxtı müəyyən edilməyib.


Müəllif: Hacı Zeynalov