Ali Məhkəmədən jurnalistin atasını ölüdürən AZAL işçisi ilə bağlı - Qərar

Jurnalist İmdad Əlizadənin atası, Qarabağ müharibəsi veteranı Əli Əliyevi avtomobillə vuraraq öldürən “Azərbaycan Hava Yolları” QSC-nin (AZAL) işçisi Seymur Qarayevin cinayət işi üzrə verilən kasasiya şikayətlərinə baxılıb.

Teleqraf.com xəbər verir ki, bu gün Ali Məhkəmədə hakim Hafiz Nəsibovun sədrlik etdiyi iclasda tərəflər çıxış edib.

Zərərçəkmiş şəxin hüquqi varisi-mülki iddiaçı İmdad Əlizadənin nümayəndəsi, vəkil Abil Bayramov bildirib ki, bu iş üzrə verilən mülki iddia ilə bağlı qərardan daha əvəvl verilmiş kassasiya şikayətinə əsasən Ali Məhkəmə işi yenidən apellyasiya instansiyasına qaytarmışdı: "Ali Məhkəmənin qərarına uyğun olaraq Bakı Apelyasiya Məhkəməsi işə baxıb və yeni qərar çıxarıb. Apelyasiya instansiyasında işə baxılarkən Ali Məhkəmənin göstərdiyi iradlar aradan qaldırılıb və təqsirləndirilən Seymur Qarayevdən, ümumilikdə, 141 min 931 manat tutularaq mülki iddaçı İmdad Əlizadəyə ödənilməsi ilə bağlı qərar qəbul edilib".

Vəkil həmin qərardan məhkum - mülki cavabdeh S.Qarayev tərəfindən verilən şikayətin əsassız olduğunu deyərək, təmin edilməməsini istəyib.

Həmçinin zərərçəkmiş tərəf S.Qarayevə verilən cəzanın və mülki iddia məbləğinin artırılması ilə bağlı da kasasiya şikayəti verib. Vəkil A.Bayramov həmin şikayətin təmin edilməsini istəyib.

Məhkumun vəkili Fuad Məmmədov S.Qarayevin kasasiya şikayətinin təmin edilməsini, zərərçəkmiş şəxsin hüquqi varisi İ.Əlizadənin kasasiya şikayətinin isə təmin edilməməsini xahiş edib.

Dövlət ittihamçısı Süleyman Atakişiyev zərərçəkmiş şəxsin hüquqi varisi, həmçinin mülki iddiaçı İmdad Əlizadənin verdiyi şikayətin təmin edilməsini, cavabdeh tərəfin kasasiya şikayətinin isə təmin edilməməsini istəyib.

Məhkəmə müşavirədən sonra qərarı elan edib.

Qərara əsasən, tərəflərin kasasiya şikayətləri təmin edilməyib, S.Qarayevdən 141 min 931 manat tutularaq mülki iddaçı İmdad Əlizadəyə ödənilməsi ilə bağlı qərar qüvvədə saxlanılıb.

Qeyd edək ki, hadisə 2016-cı ilin fevral ayının 14-də baş verib.

"Azərbaycan Hava Yolları" QSC-nin (AZAL) işçisi Qarayev Seymur Vidadi oğlu idarə etdiyi GAC markalı 99-AD-434 qeydiyyat nişanlı avtomobillə Bakının Ziya Bünyadov prospektində yolu keçmək istəyən Laçın rayonunun Oğuldərə kənd sakini, Qarabağ müharibəsi veteranı Əli Əliyevi və Neftçala rayon sakini Əliəsgər Talıbovu vurub.

Ağır kəllə-beyin travması almış Əli Əliyev 7 ay Mərkəzi Klinikada, 8 ay 17 gün isə "Avrasiya Hospital"ında müalicə alıb. Daha sonra o, Bakı Sağlamlıq Mərkəzinə köçürülüb. 504 gün komada qalan Ə.Əliyev 2017-ci ilin iyul ayının 2-də dünyasını dəyişib.

Ə.Talıbov isə bir müddət xəstəxanada müalicə olunduqdan sonra evə buraxılıb.

Mərhum Ə.Əliyevin müalicəsinə 1 saylı Kliniki Tibbi Mərkəzdə (“Semaşko”) 4700, Mərkəzi Klinik Xəstəxanada 67881, “Avrasiya” Hospitalda 59050 (mərhumun ailəsinin bu xəstəxayana əlavə olaraq 11270 manat borcu qalıb), Bakı Sağlamlıq Mərkəzində 5900 manat xərclənib. Bunları təsdiqləyən rəsmi qəbzlər cinayət işinə əlavə edilib. Eyni zamanda dəfn və yas mərasimlərinə 14000 manat civarında pul sərf olunub. Bundan başqa, zərərçəkmişin ailəsi mənəvi zərərə görə təqsirləndirilən şəxsdən 15000 manat kompensasiya tələb edib (ümumilikdə, 166 min 531manat).

Cinayət işinə Nərimanov Rayon Məhkəməsinin hakimi Samir Məmmədovun sədrliyi ilə baxılıb.

Məhkəmənin hökmü ilə S.Qarayev cəzasını məntəqə tipli cəzaçəkmə müəssisəsində çəkməklə 4 il 11 ay 28 gün müddətinə azadlıqdan məhrum edilib. Onun barəsində həbs qətimkan tədbiri seçilməyib.

Hökmdən narazı qalan İ.Əlizadə apelyasiya şikayəti verib. O, Nərimanov Rayon Məhkəməsinin çıxardığı hökmün dəyişdirilməsini, S.Qarayevin cəzasının ağırlaşdırılmasını istəyib.

İ.Əlizadə həmçinin mülki iddiasının tam olaraq təmin edilməsini tələb edib.

Bakı Apelyasiya Məhkəməsinin qərarına əsasən, birinci instansiya məhkəməsinin çıxardığı hökm dəyişdirilib.

Belə ki, təqsirləndirilən şəxsin 4 il 11 ay 28 gün müddətinə azadlıqdan məhrumetmə cəzası 4 il 6 aya endirilib.

Zərərərçəkmişin hüquqi varisininin nümayəndəsi İ.Əlizadənin isə apelyasiya şikayəti qismən təmin edilib.

Məhkəmə 166 min manat maddi və mənəvi zərər hissəsindən 120 min 931 manat ziyanın ödənilməsi barədə qərar çıxarıb.

Bu, Mərkəzi Klinika və "Avrasiya" hospitalda mərhum Əli Əliyevin müalicəsinə sərf olunan hissəyə şamil edilib. Qərara əsasən, 120 min 931 manatın 3 min manatı isə mənəvi təzminat kimi zərərçəkmişin hüquqi varisinə ödənilməli idi.

İ.Əlizadə Bakı Apelyasiya Məhkəməsinin qərarından narazı olduğu üçün Ali Məhkəməyə kasasiya şikayəti verib.

İşə Ali Məhkəmənin hakimi İmran Hacıqayıbovun sədrliyi ilə baxılıb. Qərara əsasən, təqsirləndirilən şəxsin cəzası qüvvədə saxlanılıb, mülki hissə isə ləğv edilib, yenidən baxılması üçün Bakı Apelyasiya Məhkəməsinə göndərilib.

Apelyasiya instansiyası işə yenidən baxaraq, Seymur Qarayevdən, ümumilikdə, 141 min 931 manat tutularaq mülki iddaçı İmdad Əlizadəyə ödənilməsi ilə bağlı qərar qəbul edib.

Əli Əliyev erməni işğalı nəticəsində ata-baba yurdundan didərgin düşmüş ziyalılardandır. 1946-cı ildə Laçın rayonunun Oğuldərə kəndində doğulub. Maksim Qorki adına Moskva Ədəbiyyat İnstitutunda, Azərbaycan Dövlət Universitetində (indiki Bakı Dövlət Universiteti) təhsil alıb. Laçın rayonu işğal olunana qədər Oğuldərə kənd məktəbində ədəbiyyat müəllimi işləyib.

Əli Əliyev 1993-cü il martın 30-dan mayın 23-nə kimi Laçın və Kəlbəcər rayonları ərazisində erməni mühasirəsində qalıb. Əli Əliyev və onunla birgə mühasirədə qalmış 18 nəfərin əzablı günlərindən bəhs edən "54 gün mühasirədə” adlı sənədli film çəkilib. O, həmçinin "54 gün erməni mühasirəsində” kitabının müəllifidir.

Əli Əliyev altı övlad böyüdüb, tanınmış jurnalist İmdad Əlizadənin atasıdır.