Mağazadan ərzaq aldılar, əvəzində saxta pul verdilər

Bakının Sabunçu rayonunda mağazadan saxta pulla ərzaq alıblar.

Teleqraf.com xəbər verir ki, Sabunçu rayonu, Natavan küçəsi 33 ünvanında yerləşən Sadiq Abbaszadəyə məxsus “Göyçə” marketindən saxta pulla ərzaq alıblar.

Marketə gələn iki nəfər naməlum şəxs mağazadan xeyli miqdarda ərzaq alıblar və mağaza sahibinə 2 ədəd 100 manatlıq saxta əskinas verərək hadisə yerindən uzaqlaşıblar.

Marketin sahibi saxta pulun verilməsi ilə bağlı Sabunçu Rayon Polis İdarəsinin 12-ci polis bölməsinə ərizə ilə müraciət edərək bildirib ki, iki nəfər naməlum şəxs avqustun 22-də, gecə saat 03.00-da marketə gəliblər. Onun sözlərinə görə, həmin şəxslər mağazadan alış-veriş edəndən sonra stolun üstünə 2 ədəd saxta 100 manatlıq qoyaraq oradan gediblər.

Hadisə ilə bağlı 12-ci polis bölməsində araşdırma aparılır.

Hacı Zeynalov