Bakıda 28 yaşlı oğlanın qətli ilə bağlı cinayət işi başladı

Bakının Nizami rayonunda baş verən qətl hadisəsi ilə bağlı cinayət işi başlanıb.

Bakı şəhər prokurorluğundan Teleqraf.com-a verilən məlumata görə, hadisə Keşlə qəsəbəsində qeydə alınıb.

1987-ci il təvəllüdlü Vüsal Xəlilov xüsusi amansızlıqla qətlə yetirilib.

Faktla bağlı Nizami rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Qeyd edək ki, Keşlə qəsəbəsində 1987-ci il təvəllüdlü Vüsal Xəlilovun başı kəsilib. Hadisə əslən Gəncədən olan Vüsal Xəlilovun kirayədə yaşadığı evdə baş verib. Hadisə zamanı onun həyat yoldaşı və övladı da evdə olub. Amansız cinayət onların gözü önündə törədilib.

Vüsal Xəlilovun atası Ələkbər Xəlilov Gəncə Texnologiya Universitetində, anası isə Gəncədəki 44 saylı orta məktəbdə müəllimdir. Vüsalın özü ailəsi ilə Bakıya köçüb və “28 Mall” ticarət mərkəzində paltar ticarəti ilə məşğul olmağa başlayıb.

Vüsal Xəlilovun həyat yoldaşı əməliyyatçılara bildirib ki, kirayədə yaşadıqları evin ətrafında bir neçə gündür şübhəli adamlar görürmüş. Amma, qətlin hansı səbəbdən törədildiyi məlum deyil.

Hadisə ilə bağlı başqa bir maraqlı məqam ondan ibarətdir ki, iki gün əvvəl Vüsal Xəlilovun bacısının həyat yoldaşına da hücum olub. Gəncədə valyutadəyişmə məntəqəsi sahibi olan 1971-ci il təvəlüdlü Kəmaləddin Əliyev işlədiyi obyektdən çıxaraq avtomobilinə əyləşmək istəyərkən iki nəfərin hücumuna məruz qalıb.

Onlar Kəmaləddin Əliyevin başına zərbələr endiriblər və içərisində 25 min manat olan çantasını aparıblar.

Qohumlara qarşı iki cinayətin bir-biri ilə əlaqəsinin olub-olmadığı barədə hələlik heç bir məlumat yoxdur.

Hacı Zeynalov