Yasamalda 28 yaşlı oğlanı döyərək qarət etdilər

Bakının Yasamal rayonunda quldurluq hadisəsi baş verib.

Teleqraf.com xəbər verir ki, hadisə rayonun Moskva prospekti, 73 ünvanın qarşısında qeydə alınıb.

Həmin ünvanda iki nəfər naməlum şəxs Bakı şəhər sakini, 1988-ci il təvəllüdlü Şahin Yaqubovdan pul və siqaret verməsini tələb ediblər. Şahin onlara nə pulu olduğunu, nə də siqareti olduğunu bildirib.

Bu zaman həmin şəxslər Şahin Yaqubovu döyüblər və daha sonra onun cibində olan 17 manatını götürərək hadisə yerindən qaçıblar.

Şahin Yaqubov quldurluqla üzləşməsi ilə bağlı Yasamal rayon polis idarəsinin 29-cu polis bölməsinə müraciət edib. Keçirilən əməliyyat nəticəsində cinayəti törədən Masallı rayon sakinləri – 1976-cı il təvəllüdlü Mahir İbrahimov və 1991-ci il təvəllüdlü Rüfət Əhmədov tutulublar.

Faktla bağlı Cinayət Məcəlləsinin 181-ci (quldurluq) maddəsi ilə cinayət işi başlanıb.

Hacı Zeynalov