“Oradakıları sakitləşdirməyə çalışmışıq” – Milyonluq mülk davası

Bakıda xuliqanlıqda təqsirli bilinən iş adamı Azadxan Xanməmmədov və Riyad mühafizə xidmətinin əməkdaşları Emin İsgəndərov, Savalan Məhərrəmov, Məzahir Qurbanov, Əvəz Ağayev, Yadigar Əliyev, Ramin Hüseynov, Murad Məmmədov, Rafiq Vəliyev, Elvir Vəliyev və Təbriz Musayevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Binəqədi Rayon Məhkəməsində hakim Rəşad Əliyevin sədrliyi ilə baş tutan prosesdə təqsirləndirilən Savalan Məhərrəmov ifadə verib.

O, bildirib ki, Riyad Mühafizə Xidmətinin əməkdaşı olub, hadisə zamanı həmin obyektdə mühafizəni təşkil ediblər. Savalan Məmmədov qəflətən dava düşdüyünü deyib: “Həmin zaman heç bir zorakılıq hərəkətətləri etməmişəm. Orada olanları sakitləşdirməyə çalışmışıq. Heç kimi vurmamışıq, xəsarət yetirməmişik”.

Savalan Məmmədov qeyd edib ki, heç kimə qarşı xuliqanlıq hərəkətləri etməyib.

Növbəti proses oktyabrın 24-də davam edəcək.

İttihama görə, bu il iyunun 8-də səhər saatlarında Riyad Mühafizə Xidmətinin bir neçə əməkdaşı ilə Binəqədi rayonu, Mir Cəlal küçəsi, 1 ünvanında yerləşən “Safastore” mağazasının işçiləri arasında dava düşüb.

Nəticədə mühafizə xidmətinin əməkdaşları mağaza işçilərini döyüb. İnsidentin səbəbinə gəlinc, bir müddət əvvəl sahibkar Azadxan Xanməmmədov sözügedən mağazanı 1.5 milyon manata əvvəlki sahibinə satıb, amma sənədləri rəsmiləşdirməyib, əvvəlki sahib isə pulu geri qaytarmadan mağazanın boşaldılmasını və geri təhvil verilməsini tələb edib. O, mağazanın boşaldılması üçün Riyad Mühafizə Xidmətinə müraciət edib.

Hadisə ilə bağlı Azadxan Xanməmmədov, Emin İsgəndərov, Savalan Məhərrəmov, Məzahir Qurbanov, Əvəz Ağayev, Yadigar Əliyev, Ramin Hüseynov, Murad Məmmədov, Rafiq Vəliyev, Elvir Vəliyev və Təbriz Musayev saxlanılaraq istintaqa cəlb olunub.

Təqsirləndirilən şəxslər Cinayət Məcəlləsinin 221.2.1-ci (xuliqanlıq, bir qrup şəxs tərəfindən törədildikdə) və 221.2.2-ci (xuliqanlıq, ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə törədildikdə) maddələri ilə ittiham edilirlər.