Bəlkə o tərəfdə yandım… - Aktyordan etiraf

Teleqraf.com-un “Ölümqabağı” layihəsinin növbəti qonağı “Bacanaqlar” serialının “Məhəbbət”i, rejissor və ssenarist Ramin Hacıyevdir.

Yaxında öləcəyinizi bilsəydiniz:

- …nə düşünərdiniz?

- Düşünərdim ki, mən niyə gəlmişdim bu həyata? Neyləyə bildim? Nə qoydum getdim?.. Əslində vallah, öləcəyimi bilməsəm də, tez-tez bu sualı özümə verirəm ki, ümumiyyətlə, mən kiməm? Nə işlə məşğulam? Nəyə gəlmişəm?..

- … hansı yeməkdən yeyib hansı içkini içərdiniz?

- Xəngəl yeyərdim, üstündən də tərxun kompotu içərdim. Öz də kompot sərin olsun, bum-buz… Dünyanın işini bilmək olmaz. Bəlkə elə o tərəfdə yandım?!.

- …son kəs kiminlə görüşmək istəyərdiniz?

- Öz yaxınlarımla görüşərdim.

- son dəfə serialınızda rolunuzu necə oynayardınız?

- Son dəfə rolumu oynayanda ağlayardım…

- …ən dəyərli əşyanızı kimə verib gedərdiniz?

- Ən dəyərli əşyam yoxdur, amma olsa, ən dəyərli adamlara verərəm.

- …son dəqiqələrinizi necə keçirtmək istəyərdiniz?

- Ancaq namaz qılardım…

- …o biri dünyada kimi görmək istəyərdiniz?

- Allahı və onun mələklərini, peyğəmbəri və Həzrəti Əlini görmək istəyərdim…

- …kimi özünüzlə aparmaq istəyərdiniz?

- Heç kimi, məncə…

- …son 3 kəlməniz nə olardı?

- Lə iləhə illəllah…

- …son yalanı kimə danışardınız?

- Yalan danışmazdım… Əksinə indiyə kimi danışdığım yalanları bir-bir etiraf edərdim.

- …son etirafınız nə olardı?

- Sadəcə olaraq, sevgimi etiraf edərdim. Yoldaşıma, övladlarıma, anama, qardaşıma…

- …Allahı görsəydiz nə istəyərdiniz?

- Ancaq rəhm istəyərdim. Düşünürəm ki, Allahın rəhmi biz düşündüyümüzdən də çoxdur. Allah bizi bağışlasın…