29 İyun 10:44
3 453

Belarus Prezidenti Aleksandr Lukaşenko mövcud mürəkkəb geosiyasi vəziyyətdə respublikanı Rusiyanın yeganə müttəfiqi adlandırıb.

Teleqraf.com xəbər verir ki, o, bunu Minsk vilayətinin nümayəndələri ilə görüşdə deyib. Görüşlə bağlı süjet “Belarus-1” telekanalında yayımlanıb.

“Rusiya ilə qalan yeganə müttəfiq Belarusdur”, – deyə o bildirib.

A.Lukaşenko əlavə edib ki, respublika Rusiyanın “almanlardan sonra” ikinci ən böyük qaz alıcısıdır: “Biz onların çox miqdarda neftini emal edirik. Əlbəttə, onlar Belarusu iqtisadi, amma ən başlıcası siyasi baxımdan itirmək istəmirlər. Çünki Belarusu itirmək Rusiyanın daxili siyasətinə ağır zərbə olacaq”, - deyə o qeyd edib.

Avqustun 9-da Belarusda prezident seçkiləri keçiriləcək. Altıncı müddət üçün seçki yarışına qatılmaq niyyətində olan Lukaşenko bəyan edib ki, ölkədə inqilab təşkil etmək istəyirlər. O, iyunun 25-də seçki kampaniyasına xarici müdaxilədən şikayətlənib. Onun sözlərinə görə, Rusiyanın Telegram-kanalları Belarus hakimiyyətini nüfuzdan salmaq üçün “dəhşətli feyk”lər yayır. O, yaranmış vəziyyəti Rusiya Prezidenti Vladimir Putinlə müzakirə edəcəyinə söz verib.


Müəllif: Səxavət