Zelenskidən SSRİ mesajı – “Rusiyanın bunun üçün hədəfində olan ölkələr...”

NATO-nun bugünkü sammiti sayəsində Şimali Atlantika Müqaviləsi Təşkilatının yeni tarixi başlayacaq.

Teleqraf.com xəbər verir ki, bunu Ukrayna Prezidenti Vladimir Zelenski NATO-nun Madriddə keçirilən sammitində çıxışı zamanı deyib.

Zelenski NATO sammitinin həlledici və təməlqoyma olacağını bildirib:

“Bu gün həqiqətən yeni hekayənin başlanğıcıdır. Təkcə NATO-nun şərq cinahı yox, bütövlükdə alyans, bütün Avro-Atlantik məkan üçün. Kremlin son dərəcə aqressiv olduğu bir dövrdə dünyanın son dərəcə cəsarətli ittifaqa ehtiyacı var. Əminəm ki, bu sammitin nəticələri və NATO-nun gələcəyinin necə olacağı bir il sonra keçiriləcək növbəti toplantıda özünü göstərəcək. Alyansın gələn il keçiriləcək sammitində onlayn yox, birbaşa sizə xitab edəcəyəm və bu, bizim qələbəmizin sübutu olacaq”.

Zelenskinin fikrincə, təkcə Ukrayna yox, alyansa üzv olan bir neçə başqa dövlət atəş altında qalarsa, gələn il daha pis vəziyyət yarana bilər ki, bu da tamamilə mümkündür.

“Hamınız yaxşı bilirsiniz ki, Rusiyanın hansı məqsədləri var. İllərdir Ukrayna NATO-ya daxil olarsa, müharibəyə başlayacağı ilə hədələyirdi. Amma Ukrayna NATO üzvü deyil, bununla belə, Rusiyanın dövlətimizə qarşı genişmiqyaslı müharibəsi 126 gündür - Donbasda səkkiz illik müharibədən sonra davam edir. Bəs niyə hamı onilliklər ərzində Rusiyanı nəyəsə təhrik edənin NATO olduğuna inanırdı?”.

Ukrayna prezidenti vurğulayıb ki, Rusiyanın məqsədləri məlumdur və göz qabağındadır:

“Rusiya rəhbərliyi dünyaya sizin kimi yox, başqa cür baxır. Onlar, məsələn, Litvanı sizin alyansın üzvü kimi yox, Sovet İttifaqının bir respublikası kimi görür. Bizim üçün müstəqil dövlətdir və keçmiş SSRİ respublikasıdır. Bizim üçün bu keçib, amma onlar bunu mümkün gələcək kimi görürlər, onu yenidən əsarət altına almaq istəyirlər. Onlar belə görürlər. Eyni şey Rusiyanın qonşusu olan hər bir ölkəyə aiddir. Vaxtilə Moskvanın təsiri altında olan hər bir dövlətə...”.