Ərdoğan tərəfdarlarına çağırış etdi: "Seçki qutularının yanından ayrılmayın"

Türkiyə Prezidenti Rəcəb Tayyib Ərdoğan tərəfdarlarına çağırış edib.

Teleqraf.com xəbər verir ki, o bu barədə tviterdə yazıb.

“Səhər tezdən məntəqələrdə vəzifələrini yerinə yetirən hər bir mübarizə yoldaşıma təşəkkür edirəm. Nəticələr dəqiq məlum olmamış bütün qardaşlarımızı seçki qutularının yanından ayrılmamağa çağırıram. İndi millətimizin iradəsini son ana qədər qorumaq vaxtıdır”.

Qeyd edək ki, Türkiyədə prezident seçkilərinin ikinci turu üzrə səsvermə prosesi başa çatıb.

Xatırladaq ki, mayın 14-də baş tutan seçkilərdə prezidentliyə namizədlərdən heç biri 50 %-dən çox səs toplamadığı üçün bu gün səsvermənin ikinci turu keçirilib. Türkiyə tarixində ilk dəfədir ki, prezident seçkiləri ikinci tura qalır.

Prezident vəzifəsi uğrunda 2 namizəd mübarizə aparıb. Bunlar “Cümhur İttifaqı”nın namizədi, hakim Ədalət və İnkişaf Partiyasının sədri, hazırkı dövlət başçısı Rəcəb Tayyib Ərdoğan və “Millət İttifaqı”nın namizədi, müxalif Cümhuriyyət Xalq Partiyasının sədri Kamal Kılıçdaroğludur.