Putin Türkiyəyə gəlməkdən imtina edir? – Ankara və Kremlin mesajları fərqli oldu

Rusiya Prezidenti Vladimir Putinin Türkiyəyə səfərinə hazırlıq davam edir.

Teleqraf.com xəbər verir ki, bunu Türkiyə prezidentinin baş müşaviri Akif Çağatay Kılıç deyib.

“Bu istiqamətdə işlər davam etdirilir. Rusiyada daxili durumla əlaqədar qrafik hazırlanır, səfərin tarixi ilə bağlı danışıqlar aparılır. Bunun üzərində işləyirik”, - Türkiyə rəsmisi bildirib.

Kılıç həmçinin qeyd edib ki, Ankara iyulun 17-də ləğv edilmiş taxıl müqaviləsinin bərpası üzərində işləyir.

Rusiya mətbuatının iddiasına görə, prezidentlər Rəcəb Tayyib Ərdoğan və Vladimir Putin avqustun 31-də görüşə bilərlər, amma məkan dəqiqləşdirilməyib. Bundan əvvəl Rusiya liderinin sözçüsü Dmitri Peskov deyib ki, prezidentlərin görüş yeri və dəqiq tarixi diplomatik kanallar vasitəsilə razılaşdırılacaq.

Eyni zamanda, Peskov görüş yerinin müzakirə ediləcəyini, bunun Türkiyə olmasının vacib olmadığını bildirib.