Makronun təklifi etiraz yaratdı – “Bu, savaşın miqyasını genişləndirə bilər”

Fransa Prezidenti Emmanuel Makronun HƏMAS-la mübarizə üçün beynəlxalq koalisiya yaratmaq təklifi Fələstin-İsrail münaqişəsinə cəlb olunmaq istəməyən Avropa ölkələrində maraq doğurmayacaq. Eyni zamanda, belə bir ideya uzun müddətdir Yaxın Şərqdə davam edən münaqişənin həllinə töhfə verməyəcək.

Teleqraf.com xəbər verir ki, bunu rusiyalı politoloq Vitali Naumkin deyib.

“Bu, başqa bir axmaqlıq sayıla bilər və Makronun tamamilə məsuliyyətsiz lider olduğunu göstərir”, - Naumkin qeyd edib.

Ekspertin fikrincə, bir sıra ölkələr Fransa liderinin təşəbbüsünü dəstəkləsə də, Avropa dövlətlərinin əksəriyyəti Fələstin-İsrail münaqişəsinə cəlb olunmaq istəmədiyi üçün bu plana geniş həvəs olmayacaq. Bundan əlavə, Naumkin mümkün koalisiyanın hərbi əməliyyatlarda iştirakının münaqişənin həllinə töhfə verəcəyinə şübhə ilə yanaşır. Əksinə, o, bunun münaqişəni daha da genişləndirəcəyini düşünür.

“Makronun marağı bir növ daha böyük və regional rol oynamaqdır. Bunlar ambisiyalardır, amma bunun arxasında heç nə yoxdur”, - ekspert bildirib.

Bundan əvvəl Fransa prezidenti İsrail Baş naziri Benyamin Netanyahu ilə Təl-Əvivdə keçirdiyi görüşdə HƏMAS-la mübarizə üçün regional və beynəlxalq koalisiyanın yaradılması təklifini verib. Makronun sözlərinə görə, belə bir addım İsrailin, eləcə də terror təhlükəsi ilə üzləşən qonşu dövlətlərin təhlükəsizliyini təmin etməyə kömək edəcək.