Heç kim belə göstəriş verə bilməz – Pənahovdan xəbərdarlıq

Xarici və yerli jurnalistlərin seçki günü yaydıqları məlumatlardan biz yaxşı mənada yararlanırıq. Xoşagəlməz hallar baş verdikdə dərhal onu aradan qaldırmağa çalışırıq.

Teleqraf.com xəbər verir ki, bunu keçirdiyi mətbuat konfransında Mərkəzi Seçki Komissiyasının sədri Məzahir Pənahov bildirib.

O, seçkinin ağır proses olduğunu bildirib: “Çünki prosesdə milyonlarla insan iştirak edir. Biz sizin zənglərinizi gözləyəcəyik, MSK-da “Qaynar xətt” fəaliyyət göstərir. Elektron poçtumuza da müraciət edə bilərsiniz”.

MSK sədri seçki proseinin sonrakı məhrələsi barədə də danışıb:

“Seçki məntəqələri bağlandıqdan sonra komissiya üzvlərinin məntəqədə olan, lakin hələ səs verməmiş seçicini tələsdirməyə, ona təzyiq göstərməyə ixtiyarı yoxdur. Düzdür, məntəqələr bağlandıqdan sonra heç kim içəri daxil ola bilməz. Ancaq hələ səs verməmiş seçicinin məntəqəni tərk etməsinə də kimsə göstəriş verə bilməz. Bundan sonra qanunvericiliyə uyğun digər proseslər görülməlidir.

Əvvəlcə daşınan qutular açılmalı, səslər sayılmalı, sonra isə daşınmaz qutular açılamlı və bülletenlər sayılmalı, məntəqə seçki komissiyasının yekun protokolu təsdiq olunmalı, sonra isə müşayiətlə dairər seçki komissiyasına göndərilməlidir. Məntəqlərin nəticələri aydın olduqdan sonra dərhal “Seçkilər” İnformasiya Mərkəzinin monitorunda görüntüsü yayılacaq. Ölkə üzrə nəticələr daxil olduqca burda əyləşmiş KİV təmsilçilərinin iştirakı ilə biz prosesləri izləyəcəyik.

Ölkə üzrə seçicilər vahid bülletenlə səs verəcəklər. 19:15-dən sonra son seçici məntəqəni tərk edir. Saat 21:00-dan sonra ilk protokol məlumatları monitorda öz əksini tapacaq. Aşağı seçki komissiyaları işini buna uyğun qurmalıdır. Səsvermədən sonra nəyəsə vaxt sərf etməyə, istirahətə ixtiyarımız yoxdur. Hətta bu qadağandır.

Səslərin sayılması, protokollaşdırılması prosesi sürətlə getməlidir. Onlar özləri də çalışmalıdır ki, proses tez başa şatsın. Azərbaycan ictimaiyyəti bunu gözləyir, dünya ictimaiyyəti də tez məlumat almalıdır. Müəyyən məlumat aldıqdan sonra bu barədə ilkin məlumatı açıqlayacağıq”.

Komissiya sədri zərurət yaranacağı təqdirdə əlavə mətbuat konfransının kçiriləcəyini bildirib.