Bakı-Nyu-York reysinin prosedurları açıqlandı

ABŞ-ın Azərbaycandakı səfirliyi Azərbaycandan Birləşmiş Ştatlara ilk birbaşa uçuşun həyata keçirilməsi ilə bağlı açıqlama yayıb.

Səfirlikdən Teleqraf.com-a daxil olan açıqlamada deyilir:

“Birləşmiş Ştatların Azərbaycandakı səfirliyi Azərbaycan Hava Yollarının Birləşmiş Ştatlara etdiyi ilk birbaşa uçuşunu böyük məmnunluqla bəyan edir. Bu kimi uçuşlar turizmin və yük daşımalarının inkişafına təkan verəcək və insanlar arasında münasibətləri genişləndirərək iki dövlət arasında olan dostluğu gücləndirəcək”.

Qeyd olunur ki, ilk hava reysinin gerçəkləşməsi ABŞ və Azərbaycan hökumətlərinin bir neçə illik əməkdaşlığının zirvə nöqtəsidir: “ABŞ-ın Ticarət və İnkişaf Agentliyi Beynəlxalq Aviasiya Təşkilatının üzvü olan Azərbaycana edilən aviasiya təhlükəsizliyinin texniki yardımının iki mərhələsini maliyyələşdirib. Bunun sayəsində Azərbaycan Dövlət Mülki Aviasiya Administrasiyası Azərbaycanın üzərinə düşən 8 mühüm təhlükəsizlik elementinə dair öhdəlikləri daha səmərəli yerinə yetirə bilib. 2014-cü ilin martında isə beynəlxalq aviasiya təhlükəsizliyinin qiymətləndirilməsini uğurla keçən Azərbaycan ABŞ-ın Federal Aviasiya Administrasiyası tərəfindən aviasiya təhlükəsizliyi sahəsində 1-ci ranq kateqoriyası alıb. Bu isə Azərbaycanın hava daşıyıcılarına birbaşa ABŞ-a uçuş etmək icazəsi verir. Azərbaycan Hava Yolları və ABŞ-ın Nəqliyyat Təhlükəsizliyi Administrasiyasının son aylarda etdiyi əməkdaşlıq nəticəsində, Azərbaycanın ABŞ-a birbaşa hava reyslərinın keçirilməsi üçün bütün aviasiya təhlükəsizlik tələblərinə uyğun olması təmin edildi”.

Səfirlik Azərbaycan hökumətini son bir neçə il ərzində göstərdiyi əzmkarlıq və peşəkarlıq nəticəsində əldə olunmuş uğur münasibətilə təbrik edib. Qeyd olunub ki, ABŞ hökuməti gələcəkdə də Azərbaycanla mülki aviasiya sahəsində işi davam etdirmək və iqtisadi əməkdaşlığı gücləndirmək ümidindədir.

Səxavət