Lavrov Ermənistan parlamentinin sədrini yalan danışmaqda ittiham etdi

Ermənistan rəsmilərinin Rusiyanın Qarabağı Azərbaycana “təslim etməsi” ilə bağlı açıqlamaları reallığa uyğun gəlmir.

Teleqraf.com xəbər verir ki, bunu Rusiyanın xarici işlər naziri Sergey Lavrov Nyu-Delidə keçirdiyi mətbuat konfransında deyib.

"Bəzi xadim, mənim fikrimcə parlamentin rəhbəri, Qarabağı Rusiyanın Azərbaycana "verdiyini" söyləyib. Bundan daha səhv və vicdansız bəyanat təsəvvür etmək çətindir”, - Rusiya Xarici İşlər Nazirliyinin rəhbəri bildirib.

O qeyd edib ki, Qarabağın “təslim olmasında” Rusiyanı günahlandırmağa ehtiyac yoxdur və əlavə edib ki, Ermənistan hakimiyyəti öz xalqı qarşısında müstəqil cavab verməlidir.

Qeyd edək ki, bir müddət əvvəl Ermənistan Respublikası Milli Assambleyasının sədri Alen Simonyan “erməni cəmiyyətinin “Rusiyanın Qarabağı təslim etdiyi” fikirlərini səsləndirmişdir.