Tiflisdən sülh müqaviləsi mesajı: “Bakı və İrəvanla anlaşmışıq”

“Gürcüstanın əsas məqsədi qardaş saydığı iki ölkə - Azərbaycan və Ermənistanla birlikdə regionda sülh və sabitliyi təmin etməkdir”.

Teleqraf.com xəbər verir ki, bunu Gürcüstan xarici işlər naziri İlya Darçiaşvili deyib.

Onun sözlərinə görə, Tiflis bu prosesdə qərəzsiz oyunçu rolunu kifayət qədər uğurla oynayır.

“Baş nazirin (İrakli Qaribaşvili) xüsusi səyləri və hər iki ölkənin rəhbərləri ilə şəxsi münasibətləri sayəsində hər iki ölkə üçün qarşılıqlı faydalı saziş şəklində konkret nəticə əldə etmişik”, - nazir bildirib.

Darçiaşvili qeyd edib ki, Azərbaycan və Ermənistan açıq şəkildə sülh müqaviləsinin imzalanmasının zəruriliyindən danışmağa başlayıb, onların ritorikası tamamilə sülhə yönəlib.

“İki dost və qardaş xalqımızla birlikdə əsas məqsədimiz regionda sülh və sabitliyi təmin etməkdir”, - gürcü nazir vurğulayıb.