Avropa Şurası Parlament Assambleyasının (AŞPA) yaz sessiyasında sərbəst müzakirələrdə çıxış edən Azərbaycan nümayəndə heyətinin üzvü Rövşən Rzayev son zamanlar dünya siyasətində ikili standartların hakim olduğunu diqqətə çatdırıb.
O, işğalçılığın, separatçılığın, millətçiliyin pislənməsi, eləcə də, insan hüquqlarının qorunması ilə bağlı vahid yanaşmanın olmamasının beynəlxalq hüququn təməl prinsiplərinə ötəri qiymət verilməsinə gətirib çıxardığını və nəticədə dünyada yeni münaqişələrin yarandığını vurğulayıb.
Deputat deyib: “Dünya ictimaiyyəti tərəfindən Ermənistan-Azərbaycan, Dağlıq Qarabağ münaqişəsinə vaxtında qiymət verilməməsi Avropanın siyasi xəritəsində yeni oxşar münaqişələrin yaranmasına səbəb olub. İkili standartlar siyasətinin bariz nümunəsi isə bəzi ölkələrin bu günlərdə Ermənistanda keçiriləcək qondarma ”erməni soyqırımı"nın “100 illiyi”nə göstərdiyi münasibətdir. O Ermənistan ki, onun hazırkı dövlət rəhbərləri birbaşa azərbaycanlılara qarşı etnik təmizləmə siyasəti aparıb, Xocalı soyqırımını törədib. Beynəlxalq hüququn bir ölkəyə qarşı tətbiq edilməməsi, digərinə qarşı isə tətbiq olunması, ikili standartlar siyasətinin nümayişi deyilmi?".
Bakı idmançıları qonaqları səbirsizliklə gözləyir
Azərbaycanda keçiriləcək ilk Avropa Oyunlarından bəhs edən deputat Sahibə Qafarova bildirib: “Şübhəsiz, Avropa Oyunlarının Bakıda keçirilməsi ölkəmizin böyük tarixi uğurudur. Bu, müstəqilliyinin cəmi 24 yaşı olan bir ölkəyə böyük etimad, inamdır. Bu cür möhtəşəm idman tədbirinin keçirilməsi üçün məkan olaraq Azərbaycanın seçilməsinə ciddi əsaslar var. Əvvəla, cəmi 24 illik müstəqillik tarixinə malik müasir Azərbaycan dövləti bu qısa zamanda böyük uğurlara imza atmaqla yerləşdiyi Cənubi Qafqaz regionunun lider dövlətinə çevrilib.
Azərbaycan dövlətinin bu uğurlarının mərkəzində dayanan əsas amil isə milli maraqlara söykənən, vətəndaşlarının hüquq və azadlıqlarının müdafiəsini özündə əks etdirən, həmçinin xarici dövlətlər və təşkilatlarla əlaqələrinin tərəfdaşlıq çərçivəsində inkişafına nail olan siyasətin həyata keçirilməsidir.
Bununla yanaşı, bu gün Azərbaycan həm də dünya miqyasında idman ölkəsi kimi tanınır. Əlbəttə ki, idmana dövlət səviyyəsində xüsusi diqqət və qayğının göstərilməsi həm cəmiyyətimizdə gənc nəslin sağlam yetişməsinə, həm də Azərbaycanın beynəlxalq miqyasda idman ölkəsi kimi tanınaraq nüfuzunun artmasına xüsusi töhfələr verir.
Azərbaycan bu Oyunları keçirməyə tam hazırdır. Oyunların keçirilməsi ilə bağlı paytaxtımızda bütün zəruri işlər tamamlanıb, güclü infrastruktur yaradılıb. Azərbaycanın birinci xanımı Mehriban Əliyevanın rəhbərlik etdiyi Avropa Oyunları Təşkilat Komitəsində çalışan peşəkar komanda çox qısa müddətdə - 3 il ərzində demək olar ki, öz işini yekunlaşdırır. Baxmayaraq ki, bu səviyyəli idman yarışlarını təşkil etmək üçün dövlətlərə bəzən 7-8 il vaxt lazım olur. Təsadüfi deyil ki Avropa Olimpiya Komitəsinin və digər beynəlxalq idman federasiyaların rəhbərliyi paytaxtımızda görülən işləri çox yüksək qiymətləndirib və vurğulayıblar ki, Avropa Olimpiya hərəkatının standartları Bakıda müəyyənləşəcək. İndi Bakı idmançıları və olimpiya ruhunu yaşamaq üçün paytaxtımıza üz tutan qonaqları salamlamağı səbirsizliklə gözləyir.
Çox təəssüf ki, belə bir ərəfədə bəzi siyasi dairələr ədalətsiz və qeyri-obyektiv şəkildə Avropa Oyunlarını siyasiləşdirməyə, ölkəmizə qarşı həqiqətdən uzaq ittihamlar səsləndirməyə çalışırlar. Biz bu kampaniyanın daha əvvəllər də, ölkəmizdə “Eurovision” mahnı müsabiqəsinin keçirildiyi vaxtda da şahidi olmuşuq. Azərbaycan xalqı burada əsas məqsədin nədən ibarət olduğunu yaxşı bilir. Ölkəmizə qarşı bu cür təzyiqlər qəbulolunmazdır və bu təzyiqlər heç bir nəticə verməyəcək".
“Azərbaycan torpaqları işğaldan azad olunmayana qədər, işğal və terror aktlarının sayı da azalmayacaq”
Azərbaycanın AŞPA-dakı nümayəndə heyəti rəhbərinin müavini Sevinc Fətəliyeva isə bildirib ki, bu gün dünyanın hər bir yerində eskalasiya və xoşagəlməz hadisələr müşahidə olunur: “Yaxın Şərqdəki, Ukraynadakı hadisələr, dünyanın müxtəlif ölkələrində terror aktları və iğtişaşlar buna nümunədir. Hər sessiyamizda mövzu ilə əlaqəli müzakirə olunan ölkələrin siyahısı çoxalır. Lakın bir sual yaranır: Bu mübarizə nəyin naminə aparılır? İnsan qanı nəyin naminə tökülür?
Təbii ki, bütün bu hadisələrin hamısı hər ölkənin öz tarixinə və ümumiyyətlə, dünya tarixinə düşəcək. Lakin tarixdə hansı adla əksini tapacaq? Təcrübə göstərir ki, eyni hadisələr illər öncə baş verməsindən asılı olmayaraq müxtəlif aspektlərdə interpretasiya olunur və yüz illər sonra qeyri-real, həqiqəti özündə əks etdirməyən tarixi qiymət alır. Qəddarlıq, etnik və dini dözümsüzlük, ərazi iddiaları, hakimiyyət uğrunda mübarizə dünyada hökm sürür. Nədən bəzi hallarda bu qurbanların qanı yerdə qalır, tarixi qiymətini tapmır, digər hallarda isə müharibədə həlak olanlar şəhidlərə çevrilir? Tarixi hadisələr heç vaxt öz tarixi mahiyyətini itirib müəyyən siyasi maraqlara xidmət etmək üçün dəyişə bilməz.
Azərbaycan uzun illərdir ki, beynəlxalq təşkilatlar qarşısında Xocalı soyqırımına siyasi qiymət vermək məsələsini qoyur. İyirmi ildən çoxdur davam edən Dağlıq Qarabağ münaqişəsi dünya birliyi tərəfindən Azərbaycanın ərazi bütövlüyünü dəstəkləyən, qəbul edilən qərarlara baxmayaraq, hələ də gərginlik ocağı kimi qalır. Hər gün dinc vətəndaşlar həlak olur. Bir milyondan çox qaçqın və məcburi köçkünün taleyi hələ də qeyri-müəyyəndir.
Biz tez-tez AŞPA-da insan haqları mövzusunu müzakirə edirik. Çox nadir hallarda öz doğma torpaqlarından didərgin düşən həmin insanların hüquqlarının pozulması gündəmə gətirilir. Sual yaranır, haradadır o zaman insan haqlarının müdafiəçiləri?
Nə qədər ki, qaçqın və məcburi köçkünlərimiz doğma torpaqlarına qayıtmayacaq və onların hüquqları bərpa edilməyəcək, dünyanın müxtəlif ölkələrində qaçqınların sayı artacaq. Dağlıq Qarabağ münaqişəsi beynəlxalq hüquq çərçivəsində öz həllini tapmayana qədər, Azərbaycan torpaqları işğaldan azad olunmayana qədər, işğal və terror aktlarının sayı da azalmayacaq.
S.Fətəliyeva AŞPA-ya üzv ölkələrin nümayəndələrini siyasi preferensiyalarda daha diqqətli olmağa, baş verən hadisələrə daha həssas yanaşmağa və insan həyatının nə qədər dəyərli olduğunu həmişə xatırlamağa çağırıb.
Deputat Qənirə Paşayeva Ermənistan nümayəndə heyəti üzvlərinin Azərbaycan və Türkiyə əleyhinə qərəzli, yalan və böhtanlarla dolu çıxışlarına cavab olaraq deyib: “Xocalı soyqırımını törədən işğalçı bir ölkənin təmsilçisi olaraq sizin bu Assambleyada çıxış etməyə haqqınız yoxdur deyib. Azərbaycan ərazisinin 20 faizini işğal altında saxlayan bir ölkənin təmsilçilərinin bu Assambleyada hər hansı bir ölkəni tənqid etməyə haqqı yoxdur. Yaxşı olardı ki, erməni deputatlar yalan, qərəz dolu məlumatlarla bütün çıxışlarını Türkiyə və Azərbaycana həsr etməkdənsə, öz ölkələrindəki vəziyyətdən danışsınlar. 23 il əvvəl bütün dünyanın gözü qarşısında Azərbaycanın Xocalı şəhərində mülki insanlara qarşı amansız soyqırımı həyata keçirən Ermənistanın təmsilçilərinin burada soyqırımından danışmaq kimi mənəvi haqqı yoxdur. Biz AŞPA-nı işğalçı Ermənistana təzyiq göstərməyə çağırırıq.
Ermənilər yenə məyus oldular
AŞPA-nın yaz sessiyasında ermənilər növbəti dəfə məyus olublar. Aprelin 21-də qurumun siyasi məsələlər komitəsinin iclasında Avropa Şurası və Qazaxıstan arasında münasibətlər məsələsi müzakirə olunandan sonra Qazaxıstan üzrə AŞPA məruzəçisinin təyini ilə bağlı fikir mübadiləsi aparılıb. Bu mühüm vəzifəyə Almaniyanın AŞPA-dakı nümayəndə heyətinin rəhbəri Aksel E. Fişer və Ermənistan nümayəndə heyətinin rəhbəri Hermina Naqdalyan öz namizədliklərini irəli sürüblər.
Komitə üzvləri böyük səs çoxluğu ilə almaniyalı deputatın namizədliyini dəstəkləyiblər. Ermənistanlı deputatın namizədliyinə isə bir-iki nəfər ermənipərəst deputat səs verib. Beləliklə, Aksel E.Fişer Qazaxıstan üzrə məruzəçi seçilib.
AŞPA-da növbəti dəfə uğursuzluqla və etimadsızlıqla üzləşən ermənilər yenə də məyus olublar.
Azərbaycan nümayəndə heyətinin üzvü AŞPA-da yüksək vəzifəyə seçilib
Azərbaycan Milli Məclisinin deputatı, AŞPA-dakı nümayəndə heyətinin üzvü Sahibə Qafarova aprelin 21-də qurumda keçirilən səsvermə nəticəsində qadınlara qarşı zorakılıqla mübarizə üzrə baş məruzəçi vəzifəsinə seçilib.
Danimarkalı deputatla müqayisədə daha çox səs alaraq bu vəzifəyə seçilən S.Qafarova bundan sonra qadınlara qarşı zorakılıqla mübarizədə qurumun bütün işinin və proqramlarının formalaşdırılmasında əsas rol oynayacaq. Onun bu vəzifədə əsas rolu qadınlara qarşı zorakılığın qarşısının alınması sahəsində ictimaiyyətin, hökumətin və qeyri-hökumət qurumlarının həssaslığının daha da artırılması olacaq.
S.Qafarova, eyni zamanda, “Zorakılıqdan azad qadın” parlament şəbəkəsi üzrə siyasi əlaqələndirici vəzifəsini icra edəcək. Hazırda bu şəbəkə özündə 51 üzv və müşahidəçi dövləti birləşdirir.
Məsələyə münasibət bildirən Azərbaycan nümayəndə heyətinin rəhbəri Səməd Seyidov AZƏRTAC-a müsahibəsində deyib: “Nümayəndə heyətimizin üzvü Sahibə Qafarova seçki yolu ilə ilk dəfə AŞPA-da çox mühüm və vacib vəzifəyə - qadınlara qarşı zorakılıqla mübarizə üzrə baş məruzəçi seçilib. Bundan sonra AŞPA-da bütün müvafiq proqramlar S.Qafarovanın nəzarəti altında olacaq. Eyni zamanda, Avropa Şurası ilə BMT arasında bununla bağlı bütün məsələlərin həlli azərbaycanlı deputata etibar edilib. Bu isə özlüyündə Azərbaycan nümayəndə heyətinin növbəti uğurudur”.
Səxavət HƏMİD