Şəmkirdə silahlı şəxslərə qarşı əməliyyat – Foto

Şəmkir rayon polis şöbəsinin əməkdaşları tərəfindən əllərdə qanunsuz saxlanılan odlu silah-sursatın aşkar edilməsi istiqamətində keçirilən növbəti əməliyyat tədbirləri uğurla nəticələnib.

Bu barədə Teleqraf.com-a Daxili İşlər Nazirliyinin mətbuat xidmətinin Gəncə regional qrupundan bildirilib.

Polis əməkdaşlarının keçirdikləri əməliyyat-axtarış tədbiri nəticəsində rayon sakini, əvvəllər məhkum olunmuş Əkbər Sadıqovdan 1 ədəd istifadəyə yararlı tapança pulemyot, 1 ədəd onun komplekt hissəsi hesab edilən sandıqca və 150 ədəd 7.62 mm-lik atəşə yararlı patron aşkar edilib.

Davam etdirilən tədbirlər nəticəsində rayonun Dəllər-Cəyir kənd sakini, Elşad Əliyevdən də odlu silah aşkar edilərək götürülüb.

Belə ki, daxil olmuş məlumat əsasında keçirilən əməliyyat-axtarış tədbirləri nəticəsində E.Əliyevin yaşadığı fərdi yaşayış evinə baxış keçirilmiş və oradan 1 ədəd, istifadəyə yararlı “Makarov” konstruksiyalı tapança, həmin tapançaya aid 1 ədəd daraq, 23 ədəd patron və 1 ədəd bıçaq aşkar edilərək götürülüb.

İlkin dindirilmə zamanı, saxlanılan şəxs odlu silahı bir neçə ay əvvəl qəbirstanlıqdan tapdığını bildirb.

Şəmkir rayon polis şöbəsinin, Kür və Zəyəm polis bölmələrinin bu istiqamətdə keçirdiklər digər əməliyyat tədbirləri də uğurla nəticələnib.

Rayon sakinlərindən müvafiq sənədləri olmayan 10 ədəd müxtəlif markalı və çaplı ov tüfəngləri aşkar edilib.

Faktlarla bağlı Şəmkir rayon polis şöbəsinin istintaq bölməsində araşdırmalar davam etdirilir.