Fyuri ilə Kliçkonun revanşı üçün 120 milyonluq təklif

Tayson Fyuri və Vladimir Kliçkonun yenidən rinqdə üz-üzə gəlməsi üçün Dubay milyaderlərindən biri fantastik təklif irəli sürüb. Bu barədə Fyurinin özü açıqlama verib.

İngiltərəli boksçu revanş döyüşü üçün 120 milyon dollarlıq təklif aldığını bildirib: "Danışdığım şəxs döyüşün ona aid şəxsi yaxtada keçirilməsini istəyir. Onun sözlərinə görə yaxtada 120 nəfəri qonaq edə bilər. Bir biletin qiyməti isə 1 milyon dollar olacaq. Mənim bundan nə qədər qazanacağımı demədi. Ancaq onu bildirdi ki, qarşılaşma televiziya vasitəsi ilə canlı yayımlanmaycaq. Bundan başqa media işçiləri içəri buraxılmayacaq".

Qeyd edək ki, WBA, İBF və WBO versiyaları üzrə superağır çəkidə yeni dünya çempionu Tayson Fyuri Vladimir Kliçkonu Almaniyanın Düsseldorf şəhərində keçirilmiş qarşılaşmada xal hesabı ilə məğlub etmişdi - 115:112, 115:112, 116:111.