Yumurtanın ucuzlaşmasının sirri: “Ehtiyatlı olun” - Ekspertin XƏBƏRDARLIĞI

Yumurtanın qiyməti son bir neçə gündə xeyli ucuzlaşıb.

Teleqraf.com xəbər verir ki, həm bazarda, həm də marketlərdə yumurta 9, 8, hətta 7 qəpiyə satılır.

Marketlərin birinə üz tutduq. Broyler yumurtası 8, 9, 10, kənd yumurtası isə 20, 25 qəpiyə alıcılara təklif olunur.

Azad İstehlakçılar Birliyinin sədri Eyyub Hüseynov qiymətlərin kəskin ucuzlaşmasını broylerlərin uğurlu istehsal siyasəti ilə əlaqələndirir: “Tələbata uyğun təklif olduğu üçün qiymətlər enir. Qiymətlərdə düşmə tendensiyasının payız aylarının sonuna kimi davam edəcəyi gözlənilir”.

Bununla belə, ekspert qeyd edib ki, insanlar aprel-may aylarında yumurta alarkən diqqətli olmalıdırlar: “Üzərində istehsalçı şirkətin adı, istehsal və son istehlak tarixi göstərilən məhsulları alsınlar. Çünki fermalarda inkubator mövsümü başlayır, minlərlə yumurtanı cücə çıxarmaq üçün aparatlara yerləşdirirlər. Bir həftədən sonra hansı yumurtadan cücə çıxmayacağı bilin və həmin yumurtalar satışa buraxılır. Temperatur görmüş yumurtalar da insanların sağlamlığına olduqca zərərlidir”.

Son zamanlar marketlərdə 5-10 qəpiyə bildirçin yumurtaları da satılır. Eyyub Hüseynov bu yumurtalara da tələbat yarandığını və insan orqanziminə çox faydalı olduğunu qeyd edib.

Azərbaycan Quşçular Cəmiyyətinin sədri Aydın Vəliyev yumurtanın ucuzlaşmasını istehsalda baş vermiş artımla əlaqələndirib.

Şəfiqə