13 Noyabr 2018 16:24
1 456
12 Punto 14 Punto 16 Punto 18 Punto

Beynəlxalq Mətbuat Mərkəzində gənc müğənni Sabina Selcanın “Bu gün” adlı klipinin təqdimatı mərasimi keçirilib.

Teleqraf.com-un məlumatına görə, ekran işini türkiyəli məşhur rejissor Tamer Aydoğdu ərsəyə gətirib.
S.Selcanın mətbuat katibi Əfruzə Ağayevanın idarə etdiyi konfransda ifaçı klipin 70 min lirəyə ərsəyə gəldiyini söyləyib:
“Klip Ağ köşk adlanan yerdə çəkilib. Orada klip çəkdirmək üçün dövlət orqanlarından icazə almaq və 20 min dollar pul ödəmək lazım idi. Ancaq həyat yoldaşının yaxşı əlaqələri var deyə, pul ödəmək məcburiyyətində qalmadıq”.
Təqdimata qatılan prodüser Tarix Əliyev isə müğənninin səhhəti haqda sirr açıb. Məlum olub ki, Sabina beş ildir xərçəng xəstəliyindən əziyyət çəkir:
“Bunu deməyim Sabinaya pis təsir etsə də, deyəcəyəm. Bu gün bəzi məşhurlar xərçəng xəstəliyi adı ilə pul yığıb, mal-mülk alırlarsa, Sabinada bu, tərsinədir. O, beş ildir bu xəstəlikdən əziyyət çəkir. İstərdim ki, belə ayaq üstdə dura bilən xanımlar hər kəsə örnək olsun”.
Sabina prodüserin bu sözlərindən sonra göz yaşlarına boğulub və şərh edib ki, o, artıq sağalıb.
Paytaxtımızda qonaq olan rejissor Tamer Aydoğdu Sabina ilə işbirliyindən məmnunluq hissini ifadə edib: “Bugünədək Sibel Can, Gülşen, Demet Akalın, Petek Dinçöz kimi məşhurlara çoxsayda klip çəkmişəm”.
Mahnının sözləri və musiqisi Fərid Fətullayevə, aranjimanı Cüneyt Yalmaza məxsusdur.
Tədbirdə həmçinin aparıcı Vüsalə Kərimova, aktyor Elcan Rəsulov, müğənnilər Şəbnəm Əsədova, Elnar Xəlilov kimi məşhurlar iştirak edib.


Müəllif: Aygül Qarayeva