"Qarabağdakı şəhərsalma işlərini öz gücümüzə həyata keçiririk" - Emin Hüseynov

İşğaldan azad edilmiş ərazilərdə şəhərsalma işlərini Azərbaycan öz gücünə həyata keçirir.

Teleqraf.com xəbər verir ki, bunu Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Prezidentinin xüsusi nümayəndəsi Emin Hüseynov Ağdamda keçirilən “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda Azərbaycan Milli Şəhərsalma Forumu çərçivəsində jurnalistlərə açıqlamasında deyib.

Onun sözlərinə görə, bu ilin sonuna qədər Ağdamın baza infrastruktur işlərinin yekunlaşması gözlənilir.

E.Hüseynov qeyd edib ki, 2023-cü ilin sonunda əsas tikinti layihələri həyata keçiriləcək.

"Yaxın 2 il ərzində Ağdamda mühüm işlərə başlanılacaq",- deyə o, əlavə edib.

Xüsusi nümayəndə bildirib ki, Ağdama ilkin mərhələdə 2025-ci ildə əhalinin köçürülməsinin başlanması gözlənilir: "İlkin mərhələdə 10 min nəfərin köçü baş tuta bilər".