24 Noyabr 2019 14:17
426

Salyan rayon Heydər Əliyev Mərkəzində rayon icra hakimiyyətinin və Biləsuvar Regional Mədəniyyət İdarəsinin birgə təşkilatçılığı və “Dirili Qurbani” saz-söz məclisinin üzvlərinin iştirakı ilə UNESKO-nun Qeyri-Maddi Mədəni İrs üzrə Reprezentativ Siyahısına daxil edilmiş aşıq sənətinin yaşadılması, öyrənilməsi və təbliğinə həsr edilmiş tədbir keçirilib. Tədbir Şirvan Aşıq Məktəbinin Muğan-Salyan (Aşıq Pənah Pənahovun yaradıcılığı əsasında) aşıqlarının həyat və yaradıcılığına, ağır və keşməkeşli həyat yoluna həsr edilib.

Teleqraf.com xəbər verir ki, tədbirdə filologiya üzrə fəlsəfə doktoru Tariyel Abbaslı qonaqları salamlayaraq, aşıq sənətinin təbliği və inkişafı istiqamətində ölkəmizdə həyata keçirilən layihələrdən bəhs edib.

Çıxışlarda Salyan aşıq mühiti və triosu haqqında geniş məlumat verilib. Tədbir “Dirili Qurbani” saz-söz məclisi üzvlərinin, o cümlədən Əməkdar mədəniyyət işçisi, sənətşünaslıq üzrə fəlsəfə doktoru Aşıq Əhliman Şirvanlının, Azərbaycan Dövlət Mədəniyyət və İncəsənət Universitetinin "Aşıq sənəti" kafedrasının, həmçinin Şəmkir Regional Mədəniyyət İdarəsinin tabeliyində olan Gədəbəy Aşıq Musiqi Məktəbinin müəllim və tələbə heyətinin çıxışları ilə davam edib.

Tədbirdə habelə Gədəbəy Aşıq Musiqi Məktəbində toplanmış aşıq sənəti ilə bağlı materiallar sərgilənib. Tədbir çərçivəsində Salyan rayon Mədəniyyət Mərkəzinin yeni yaradılan "Ruhani" Aşıq Folklor Qrupu ictimaiyyətə təqdim olunub və qrupun, eyni zamanda qonaq aşıqların ifası tamaşaçılar tərəfindən rəğbətlə qarşılanıb.


Müəllif: Teleqraf.com