“İrəvanda maraqlı oyun…” - Ermənistan-Azərbaycan düşmənçiliyinin müəllifi hədəfdə

Ermənistanın Baş naziri Nikol Paşinyan parlament seçkilərinə hazırlaşır. Ona görə də rəqiblərini neytrallaşdırmaq haqqında düşünür. O, keçmiş prezident Serj Sərkisyana elə bir zərbə endirdi ki, eks-prezidentin yenidən siyasətə qayıdışı mümkünsüzdür. Növbə çatıb keçmiş prezident Robert Köçəryana. Paşinyan üçün Köçəryan Sərkisyandan az təhlükəli fiqur deyil.

Teleqraf.xəbər verir ki, bu sözləri politoloq Elxan Şahinoğlu deyib.

Politoloqun sözlərinə görə, Ermənistan müstəqillik qazandıqdan bu yana bu ölkəni faciəyə sürükləyənlərin başında Robert Köçəryan dayanır:

“Məhz Köçəryan kimilərin “əməyi” sayəsində Ermənistan Azərbaycan və Türkiyə ilə düşmən oldu. Fikrimcə, Ermənistan siyasətindən Qarabağ klanının ortadan qaldırılmasını Paşinyana keçmiş lideri Levon Ter-Petrosyan məsləhət bilib. Məsləhətin məğzi belədir ki, qarabağlıların Ermənistan siyasətində at oynatdıqları müddətdə Ermənistanı yaxşı heç nə gözləmir”.

Elxan Şahinoğlu bildirib ki, Nikol Paşinyan qarabağlıları ustaca siyasətdən yox etməyə çalışır:

“Məsələ bundadır ki, “Qarabağ klanı”nın üzvləri Rusiyanın dəstəyinə arxayındırlar. Ancaq Moskva Serj Sərkisyanın istefasına və ətrafının həbsinə reaksiya vermədi, Köçəryanı də hələ ki, dəstəkləmir. Nikol Paşinyan özünə o qədər arxayındır ki, Rusiyanın patronajlığı altında fəaliyyət göstərən Kollektiv Təhlükəsizlik Müqaviləsi Təşklatının erməni baş katibi Yuri Xaçaturovu həbs etmək istəyir.

Moskva hələ ki, səssizdir. Çünki, Paşinyan da hələ ki, Rusiyanın maraqları əleyhinə addım atmayıb, Rusiya ilə strateji müttəfqliyə sadiq qalacağını vəd edir. Əgər Köçrəyan Moskvadan İrəvana qayıtmasaydı və Rusiya onu İrəvana təhvil verməkdən boyun qaçırsaydı, bu Kremlin Ermənistanın yeni hakimiyyətinə qarşı demarşı olacaqdı. Kreml isə əsasız yerə Paşinyanı narazı salıb onu Qərbin qucağına atmaq istəmir. Beləliklə, Ermənistanda maraqlı siyasi oyun gedir”.