İbrahimbəyov Bakıda: verdiyi qonaqlığa kimlər gəldi? - Foto/Video

Azərbaycanın tanınmış kinodramatur Rüstəm İbrahimbəyov Bakıya gəlib.

Bu yaxınlarda (fevralın 5-də) 80 yaşını qeyd edən tanınmış kinorejissor Rüstəm İbrahimbəyov uzun müddətdən sonra Bakıya gəlib.

Teleqraf.com xəbər verir ki, bu barədə məlumatı Facebook sosial şəbəkəsində Azərbaycan Kinematoqrafçılar İttifaqının katibi Əli İsa Cabbarov yayıb.

Məlum olub ki, bu gün Azərbaycan Kinematoqrafçılar ittifaqı İdarə Heyətinin iclası keçirilib. Daha sonra dostları həmin ittifaqın sədri Rüstəm İbrahimbəyovun 80 illik yubileyini qeyd etmək üçün məclis təşkil ediblər.

Kinematoqrafçılar İttifaqının katibi Əli İsa Cabbarov R.İbrahimbəyovun iştirak etdiyi məclisdən fotoşəkil də paylaşıb.

Şəkildən görünür ki, məclisdə Azərbaycan Yazıçılar Birliyinin (AYB) sədri Anar, Azərbaycan Rəssamlar İttifaqının sədri Fərhad Xəlilov, professor Qulu Məhərrəmli, kinorejissor Tahir Tahiroviç, şair Baba Vəziroğlu və başqa tanınmış şəxslər yer alıb.

İbrahimbəyovun Bakıda ad gününü qeyd etməsi və müxtəlif sahələri təmsil edən ziyalıların ziyafətdəki iştirakı birmənalı qarşılanmayıb.

Qeyd edək ki, 2013-cü ilin prezident seçkilərində Milli Şurasının vahid namizədi olaraq Rüstəm İbrahimbəyovun namizədliyi irəli sürülsə də, o, Bakıya gələ bilmədi.