Prezidentin milli-mənəvi dəyərlərimizə qayğısının təzahürü... - Şərh

Prezident İlham Əliyev və birinci xanım Mehriban Əliyeva Tərtər rayonunun Suqovuşan qəsəbəsinə səfər çərçivəsində yeni tikiləcək məscidin təməlini qoyub. Ümumi ərazisi 0,6 hektar olan kompleksə məscid binası, köməkçi bina, dəstəmaz otağı və avtodayanacaq daxildir. İki mərtəbədən ibarət olacaq məscid binasının uzunluğu 16,8 metr, eni isə 11,2 metr təşkil edəcək. Burada kişilər və qadınlar üçün ibadət zalının olması planlaşdırılır. Layihəyə əsasən məsciddə eyni vaxtda 110 nəfərin ibadət etməsi üçün şərait yaradılacaq.

Bunu Teleqraf.com-a Milli Məclisin deputatı Ceyhun Məmmədov deyib.

O qeyd edib ki, Ermənistanın işğal dövründə vandalizmə məruz qalan mədəni-dini obyektlər sırasında İslam dini abidələri, məscidlər, türbələr və digər inanc yerləri mütləq əksəriyyət təşkil edir:

“Qarabağda rəsmi fəaliyyət göstərmiş 67 məscidin (Şuşada 13, Ağdamda 5, Füzulidə 16, Zəngilanda 12, Cəbrayılda 5, Qubadlıda 8 Laçında) 63-ü tamamilə, 4-ü isə qismən dağıdılaraq yararsız hala salınıb. Bu vəhşilik ermənilərin Azərbaycan xalqına nifrətinin və kin-küdurətinin miqyasını tam əks etdirir”.

Millət vəkili vurğulayıb ki, işğaldan azad olunmuş ərazilərimizdə hazırda geniş quruculuq işləri aparılır, yeni məscidlər tikilir:

“Onlardan biri də Suqovuşan qəsəbəsində təməli qoyulan məsciddir. Dövlət başçısının Qarabağa və Şərqi Zəngəzura səfər zamanı yeni dini ibadət yerlərinin təməlinin qoyulması artıq ənənə halını alıb. Suqovuşan qəsəbəsində məscidin təməlinin qoyulması Prezident İlham Əliyevin və Birinci vitse-prezident Mehriban Əliyevanın milli-mənəvi dəyərlərimizə yüksək diqqət və qayğısının təzahürüdür”.

Ceyhun Məmmədova görə, xalqları, dövlətləri ayaqda saxlayan onun ənənələri və dəyərləridir:

“Əsası Ulu öndər Heydər Əliyev tərəfindən qoyulan həmin siyasət bu gün Prezident İlham Əliyev tərəfindən uğurla davam etdirilir”.