Bayramovla Al Səudun müzakirə etdikləri məsələlər açıqlandı - Yeniləndi

Azərbaycan və Səudiyyə Ərəbistanı arasında müxtəlif sahələrdə əməkdaşlığın daha da inkişaf etdirilməsi üçün potensial mövcuddur.

XİN-dən Teleqraf.com-a verilən məlumata görə, bu barədə xarici işlər naziri Ceyhun Bayramovla Bakıda səfərdə olan Səudiyyə Ərəbistanının xarici işlər naziri şahzadə Feysəl bin Fərhan Al Səudla görüşündə bildirilib.

Qeyd olunub ki, oktyabrın 4-də Azərbaycan və Səudiyyə Ərəbistanı Krallığı arasında diplomatik münasibətlərin qurulmasının 30-cu ildönümü münasibətilə tədbir və sərgi keçirilib.

Tədbirdə C.Bayramov, XİN-in rəhbər heyəti, Səudiyyə Ərəbistanı Krallığının xarici işlər naziri şahzadə Feysəl bin Fərhan Al Səud, habelə Səudiyyə Ərəbistanı Krallığının Azərbaycan Respublikasındakı Səfirliyinin rəhbərliyi və əməkdaşları iştirak edib.

Tədbir hər iki ölkənin dövlət himnlərinin səslənməsi ilə başlayıb.

Tədbirdə çıxış edən Azərbaycan Respublikasının xarici işlər naziri Ceyhun Bayramov, 30 il ərzində iki dövlət arasında əlaqələrin strateji tərəfdaşlıq müstəvisinə yüksəldiyini məmnunluqla qeyd edib. Azərbaycan və Səudiyyə Ərəbistanı arasında ikitərəfli tərəfdaşlıqla yanaşı, regional və beynəlxalq formatlarda da faydalı əməkdaşlığın mövcud olduğunu bildirən nazir Ceyhun Bayramov, bir sıra təşkilatlar çərçivəsində iki ölkənin bir-birinə qarşılıqlı dəstəyi davam etdirdiyini söyləyib.

Cari səfərin münasibətlərin daha da inkişafına töhfə verəcəyi qeyd olunub. Səudiyyə Ərəbistanının hər zaman Azərbaycan Respublikasının suverenliyi və ərazi bütövlüyünü dəstəklədiyi bildirilib. Hazırda post-münaqişə dövründə Azərbaycanın bölgədə sülh quruculuğunun tərəfdarı və təşəbbüskarı qismində çıxış etdiyi, həmçinin əksər məsələlərdə birtərəfli şəkildə sülh gündəliyini irəli apardığı diqqətə çatdırılıb.

Daha sonra çıxış edən Səudiyyə Ərəbistanı Krallığının xarici işlər naziri Feysal bin Fərhan Al Səud iki ölkə arasında diplomatik münasibətlərin qurulmasının 30 illiyi münasibətilə öz təbriklərini tədbir iştirakçılarının diqqətinə çatdırıb. Nazir Feysal bin Fərhan Al Səud hazırda Azərbaycan Respublikası və Səudiyyə Ərəbistanı Krallığı arasında bir sıra birgə layihələrin uğurla icra olunmasından məmnunluqla bəhs edib.

Tədbirin sonunda iştirakçılar Azərbaycan və Səudiyyə Ərəbistanı arasında diplomatik münasibətlərin 30 illiyinə həsr edilmiş sərgi ilə tanış olublar.

***

13:02

Azərbaycanın xarici işlər naziri Ceyhun Bayramovla Bakıda səfərdə olan Səudiyyə Ərəbistanının xarici işlər naziri təkbətək görüşü başa çatıb.

Teleqraf.com xəbər verir ki, hazırda nümayəndə heyətlərinin iştirakı ilə geniştərkibli görüş keçirilir.

***

11:56

Xarici işlər naziri Ceyhun Bayramov Azərbaycanda səfərdə olan Səudiyyə Ərəbistanının xarici işlər naziri Feysəl bin Fərhan Al Səud ilə görüşüb.

Teleqraf.com xəbər verir ki, bu barədə XİN-in tviter səhifəsində paylaşım edilib.

Səfərin məqsədi tərəflər arasında diplomatik əlaqələrin 30 illiyinə həsr olunmuş tədbirdə iştirak etməkdir.