Prezident seçkiləri böyük coşqu, yüksək əhval ruhiyyə şəraitində keçirildi - Eldar Quliyev

Azərbaycanda fevralın 7-də keçirilən növbədənkənar prezident seçkiləri böyük coşqu, yüksək əhval ruhiyyə fonunda keçirildi. Xalqımız Vətən Müharibəsində olduğu kimi bu seçki prosesində də birlik, həmrəylik nümayiş etdirərək dünyaya vacib mesaj verdi. Seçki Qanunvericiliyinə uyğun olaraq demokratik, azad şəffaf seçkilərin keçirilməsi təmin olundu. Seçki hüququ olan hər bir seçici sərbəst şəkildə heç bir maneə ilə üzləşmədən seçki məntəqələrinə gələrək mövqeyini ifadə etməklə ölkəmizin gələcəyinə səs verdi.

Bunu Teleqraf.com-a Respublika Ağsaqqallar Şurasının sədri, Milli Məclisin deputatı, professor Eldar Quliyev deyib.

Professor qeyd edib ki, Azərbaycan tarixində növbədənkənar prezident seçkilərinin əhəmiyyəti böyükdür: “II Qarabağ müharibəsindən sonra yeni bir reallıq formalaşıb. Azərbaycan özünün beynəlxalq birlik tərəfindən tanınan, qəbul edilən ərazi bütövlüyünü təmin edib. 2023-cü 19-20 sentyabr tarixlərində baş tutan lokal xarakterli antiterror tədbirləri nəticəsində ölkəmizin konstitusiya quruluşu, suverenliyi tam bərpa olundu. Növbədənkənar prezident seçkiləri də məhz müasir Azərbaycan tarixində ilk dəfə olaraq bütöv ərazimizdə baş tutdu. Bu eyni zamanda Zəfər seçkisi idi. Qalib Xalq Müzəffər Ali Baş Komandanına böyük etimadını bir daha nümayiş etdirdi. Seçki günü xalqımızın məntəqələrə axın edərək, səsvermədə yüksək fəallıq nümayiş etdirdiyinin şahidi olduq. Xalqımız onu 30 ilin natamamlıq kompleksindən xilas edən, milli mənliyini, qürurunu, özünəinamını geri qaytaran, Ulu öndər Heydər Əliyev siyasi kursuna, işıqlı gələcəyə aparan şəxsiyyətə, qalib Liderə öz təşəkkürünü, sevgisini bir daha ifadə etdi. Bu eyni zamanda xalqımızın Liderinə vəfa borcu idi. Həmçinin cənab Prezident İlham Əliyevin son 20 illik fəalliyyətində əldə edilən fenomenal uğurlara ən yüksək qiymət hesab edilir”.

Eldar Quliyev cənab İlham Əliyevin seçki günü ailə üzvləri ilə birlikdə Xankəndidə səs verməsinin tarixi hadisə olduğunu söyləyib: “Bu eyni zamanda bütün dünyaya verilən açıq mesaj idi. Xankəndi ilə yanaşı Şuşada, Füzulidə, Ağalıda, Talış kəndində və digər azad edilmiş ərazilərimizdə ilk dəfə olaraq seçkilərin keçirilməsi sözsüz ki, qürurverici hadisə idi. Məhz cənab İlham Əliyevin Xankəndidə səs verməsi tarixi zəfərimizi, ölkəmizin ərazi bütövlüyü və suverenliyini tam təmin etməsini həzm edə bilməyənlərə də layiqli cavabdır. Qatılmış olduğu bütün seçkilərdən hər zaman xalqın böyük dəstəyi ilə qalib çıxan, regionun ən böyük siyasi təşkilatı olan Yeni Azərbaycan Partiyası bu seçkilərdən də zəfərlə çıxdı. Ulu öndər Heydər Əliyevin müəyyənləşdirdiyi siyasi kursa, xalqın birmanlı inamı və etibarı bu dəfə özünü ən yüksək formada tərənnüm etdirdi. Azərbaycan xalqı bir daha Dahi Şəxsiyətin müəyyənləşdirdiyi güclü dövlət, qalib xalq, müstəqil Azərbaycan fəlsəfəsinə sadiqliyini təsdiq etdi.

Növbədənkənar prezident seçkilərində cənab İlham Əliyevin inamlı qələbəsi bütövlükdə cəmiyyətin, xalqın arzu və istəyininin ifadəsi idi. Cənab İlham Əliyevin ölkəmizə rəhbərlik etdiyi son 20 il böyük tarixi uğurlarla möhtəşəm qələbələrlə müşahidə edilib. Ölkəmiz məhz bu on illiklər ərzində Ümummilli Lider Heydər Əliyevin siyasi kursu üzərində müasir dövrün çağırışlarına uyğun olaraq bütün istiqamətlərdə inkişaf edib. Bu illər ərzində Azərbaycanda demokratiya və insan hüquqları, sosial sahədə böyük uğurlar əldə olunub. Cənab İlham Əliyevin seçkilərdə inamlı qələbəsini şərtləndirən əsas amillərdən biri də məhz Onun xalqa vermis olduğu bütün vədləri ən yüksək səviyyədə olunması idi.

Cənab Prezident İlham Əliyevi seçkilərdə inamlı qələbəsi münasibəti ilə təbrik edir, Ona Azərbaycanımızın güclənməsi, daha da qüdrətlənməsi yolunda şərəfli və uğurlu fəaliyyətində müvəffəqiyyətlər arzulayıram”.