İrəvandan barışıq mesajı: “Bakı ilə razılaşdıq, kiçik addımlarla irəliləyəcəyik”

İrəvan kiçik addımlarla Azərbaycanla aramızda etimad mühiti yaratmaq istəyir və Tavuşda delimitasiya prosesi də bu məntiqə uyğundur.

Teleqraf.com xəbər verir ki, bunu Ermənistan parlamentinin komitə sədri, hakim partiyanın deputatı Vladimir Vardanyan deyib.

“Güvən kiçik addımlardan başlayır, yəni verdiyiniz vəd qarşı tərəf üçün nə qədər etibarlıdır və əksinə. Bəzi qüvvələr (Ermənistan daxilindəki radikalları nəzərdə tutur – red.) bu prosesə müdaxilə etməyə, onu dayandırmağa çalışırlar. Biz mütləq qarşılıqlı məqbul sərhədlərə malik olmalıyıq. Delimitasiya Ermənistan SSR-nin inzibati sərhədləri əsas götürülməklə hüquqi cəhətdən əsaslandırılmış şəkildə aparılmalıdır”, - Vardanyan bildirib.

Onun fikrincə, kiçik addımlarla qarşılıqlı etimad mifoloji qərarlar qəbul etməkdən qat-qat vacibdir. Deputatın fikrincə, konsensusun əldə oluna biləcəyi sahələri (sərhədləri) tapmağa çalışmaq və irəliləməyə davam etmək lazımdır, çünki real siyasət bunun üzərində qurulub.

“Razılaşma var, dövlət sərhədi Almatı bəyannaməsi əsasında müəyyən edilməlidir. Bu o deməkdir ki, Sovet İttifaqı dövründəki inzibati sərhədlər delimitasiya və demarkasiya üçün əsasdır. Bu, həm Avropa strukturları, həm NATO baş katibi, həm də bu proseslərdə iştirak edən bütün aktorların razılıqlarını ifadə etdikləri razılaşmadır”, - Vardanyan qeyd edib.

Onun sözlərinə görə, istənilən halda hər iki tərəf üçün effektli həll yolu kimi qiymətləndirilən razılaşmalar müsbətdir.