Üç yüz tələbəyə “Gələcəyin müəllimi” təqaüdü verildi

2015-2016-cı tədris ilində pedaqoji kadr hazırlığı aparılan ali təhsil müəssisələrinə qəbulda 500 və daha yüksək bal toplayan, ixtisas seçimində birinci müəllimlik ixtisasını qeyd edən ilk 300 tələbəyə 100 manat məbləğində “Gələcəyin müəllimi” təqaüdü verilib.

Təhsil Nazirliyindən Teleqraf.com-a verilən məlumata görə, bununla da “Gələcəyin müəllimi” təqaüdü alan tələbələrin sayı 600-ə çatıb. Bu il müəllimlik ixtisasını seçən abituriyentlərin orta balı 16 bal artaraq 364-ə çatıb, onların arasında 500 və daha yuxarı bal toplayan abituriyentlərin sayı əvvəlki ildən 37 faiz çox olub.

“Gələcəyin müəllimi” təqaüdünün təsis edilməsi “Azərbaycan Respublikasında təhsilin inkişafı üzrə Dövlət Strategiyası”na uyğun olaraq peşəkar bilik və kompetensiyalara malik pedaqoji kadrların hazırlanmasına xidmət edir.