Teleqraf.com xəbər verir ki, bu sözləri Fransanın Azərbaycandakı səfiri Oreliya Buşez deyib.
Onun sözlərinə görə, UFAZ bir ildir ki fəaliyyət göstərir və bu müddət ərzində müsbət nailiyyətlər əldə olunub:
"Bu layihə Fransa dövlət orqanları tərəfindən də maraqla qarşılanır. Layihənin həyata keçirilməsində Fransa Xarici İşlər Nazirliyi, Azərbaycan Xarici İşlər Nazirliyi və Təhsil Nazirliyinin böyük səyləri olub. 2016-2017-ci illərdə UFAZ-da 141 nəfər təhsil alıb ki, onlardan 120-si dövlət təqaüdü, 23-ü isə ödənişli əsaslarla təhsil alıb. Bu tələbələr TQDK imtahanlarından 500-700 bal yığan abituriyentlər arasından seçilib. İl ərzində Fransanın bir neçə dövlət rəsmisi UFAZ-da olub. Səfərlərin hər birində tələbələrlə fikir mübadiləsi aparılıb, mətbuat konfransı keçirilib. Növbəti tədris ilində universitetə 160 tələbənin qəbulu nəzərdə tutulub. Onlardan 120-si dövlət təqaüdü, 40-ı isə ödənişli əsaslarla təhsil alacaq. Ödəniş haqqı 3 min Azərbaycan manatı dəyərində nəzərdə tutulub".
Qeyd edək ki, UFAZ layihəsi Azərbaycan Prezidenti İlham Əliyev və Fransa Prezidenti Fransua Ollandın birgə təşəbbüsü ilə gerçəkləşdirilib. 2016-2017-ci tədris ili üçün UFAZ-a 4 ixtisas üzrə tələbə qəbulu həyata keçirilib. Tədris Strasburq və Ren 1 universitetlərindən cəlb edilən, eləcə də yerli mütəxəssislər tərəfindən ingilis dilində aparılır. Təhsilini uğurla başa vuran məzunlara iki diplom veriləcək.