Türkiyədə İrəvan xanlığından bəhs edildi – Foto

Türkiyənin Manisa şəhərində yerləşən Cəlal Bayar Universitetində “İrəvan xanlığı və İrəvanın itirilməsi” mövzusunda elmi konfrans keçirilib.

Teleqraf.com-un xəbərinə görə, İstanbul Azərbaycan Kültür Evinin təşkilatçılığı ilə baş tutan tədbirdə professor Ədalət Tahirzadə, dosent Əziz Ələkbərli və tədqiqatçı-jurnalist Dilqəm Əhməd çıxış ediblər.

Tədbirdə universitetin rektoru professor A.Kamal Çələbi, rektor müavini professor Müzəffər Tepekaya, universitetin müəllim və tələbə kollektivi, Manisa Azərbaycan Kültür Dayanışma Dərnəyinin idarə heyəti iştirak edib.

Konfransı giriş sözü ilə açan İstanbul Azərbaycan Kültür Evinin başqanı Hikmət Elp İrəvan xanlığı, İrəvanın itirilməsi ilə bağlı Türkiyədəki susqunluğun aradan qaldırılmasının vacibliyindən danışıb: “İrəvanın ermənilər tərəfindən işğal edilməsi, o zamankı beynəlxalq siyasətlə bağlı Türkiyədə illərdir danışılmır. İrəvan tarixi türk torpağıdır və bu barədə təşkilat olaraq Türkiyənin bölgələrində silsilə tədbirlər keçiririk”.

“İrəvanın tarixi. İrəvan xanlığı. Sovet dönəmində İrəvandan türklərin köçürülməsi” mövzusunda çıxış edən Azərbaycan Qaçqınlar Cəmiyyətinin sədri, dosent Əziz Ələkbərli İrəvan torpağının tarixindən bəhs edib, İrəvan xanlığının qurulması, süqut etmə səbəblərini açıqlayıb: “Haylar Cənubi Qafqazdakı xristian tarixinə, xristian türklərin irsinə sahib çıxaraq buradakı qədim məbədləri erməniləşdirib, daha sonra isə azərbaycanlılara aid tarixi irsi yox edərək soyqırımı aktı törədiblər”.

“1918-ci ildə beynəlxalq siyasətdə İrəvan” mövzusunda çıxış edən Bakı Avrasiya Universitetinin professoru Ədalət Tahirzadə Azərbaycan Cümhuriyyətinin qurulması dönəmində İrəvanın itirilməsinin səbəblərinə açıqlıq gətirib, Qafqaz İslam Ordusunun tarixi missiyasından bəhs edib: “1918-ci ildə İrəvanın itirilməsinin qarşısını almaq mümkün deyildi. İsrail qurulduğu zaman ərəb ölkələri qarşı çıxa bildimi? Əsla. Bu baxımdan kimisə günahlandırmaq doğru deyil”.

Tədqiqatçı-jurnalist Dilqəm Əhməd isə İrəvanda ermənilər tərəfindən yox edilən Sərdar sarayının tarixindən danışıb, sarayın Gürcüstan arxivindəki fotoşəkillərini təqdim edib.

Sonda tədbirin təşkilatçılarına və çıxışçılara təşəkkür edən universitetin rektoru A.Kamal Çələbi İrəvan tarixinin Manisada ali təhsil ocağında bəhs edilməsindən məmnun olduğunu bildirib.