12 Sentyabr 2019 10:30
3 993
12 Punto 14 Punto 16 Punto 18 Punto

Bu ilin yanvarında həbs edilən Azərbaycan Kikboksinq Federasiyasının peşəkarlar üzrə sabiq vitse-prezidenti, məşhur iş adamı Aydın Əhmədov külli miqdarda mənimsəmədə ittiham edilir.

Teleqraf.com-un xəbərinə görə, onun barəsində cinayət işi üzrə istintaq Baş Mütəşəkkil Cinayətkarlığa qarşı Mübarizə İdarəsində aparılır.

Milyonlarla dələduzluqda ittiham olunan Aydın Əhmədov ittihamları qəbul etmir, şərlənərək həbs olunduğunu iddia edir.

Aydın Əhmədov Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həbs edilib.

Mətbuatda yayılan məlumata görə, Aydın Əhmədov külli miqdarda pulu bir neçə insandan alıb və qaytarmayıb. Buna görə də ona pul verən şəxslər haqqında şikayət ediblər. Araşdırma aparılıb və nəticədə Aydın Əhmədov haqqında həbs qərarı verilib.

Aydın Əhmədovun atası Şirməmməd Əhmədov Teleqraf.com-a açıqlamasında oğlunun həbs olunmasının bəzi detallarını açıqlayıb.

O bildirib ki, oğlu 2019-cu ilin yanvarın 11-dən Daxili İşlər Nazirliyinin Mütəşəkkil Cinayətkarlığa qarşı Mübarizə İdarəsində iş adamı Ramil Quliyevin sifarişi ilə həbs olunub: “Amma Aydın Əhmədov 13 gün qanunsuz olaraq orda saxlanıldıqdan sonra yanvarın 23-də Nərimanov rayon Məhkəməsi tərəfindən barəsində 178.4-cü (etibardan sui-istifadə etməklə özgənin əmlakına xüsusi ilə külli miqdarda ziyan vurma) maddəsi ilə cinayət işi başlanıb, həbs qətimkan tədbiri seçilib. Yəni Aydın 13 gün qanunsuz həbsdə saxlanılıb”.

Oğlunun 30 yaşında Azərbaycanda bir çox uğurlara imza atdığını söyləyən ata qeyd edib ki, Aydın Əhmədov 1989-cu ildə Bakı şəhərində ziyalı ailəsində anadan olub.

Gənc yaşlarından öz dərin zəkası ilə yaşıdlarından fərqlənən Aydın universiteti bitirdikdən sonra öz gördüyü işlərlə bir çox uğurlara nail olub: “Aydın gənc sahibkar kimi “Premium Travel” turizm şirkətini yaratdı, həmçinin Kikboksinq federasiyasının vitse-prezidenti səviyyəsinə kimi yüksələ bildi.

Eyni zamanda “Euro Fight Kikboksinq” idman klubunu yaratdı. Bu uğurlarla yanaşı Aydın Əhmədov gənc yaşında Suraxanı rayon Yeni Azərbaycan Partiyasının Gənclər Təşkilatının sədri seçilmişdi.

Universitetdə oxuduğu illərdə YAP-a üzv oldu. YAP təkcə iqtidar partiyası olduğu üçün deyil, eyni zamanda Ulu Öndər Heydər Əliyevin gənclərə göstərdiyi diqqət və qayğını hiss etdiyi üçün o, YAP-ın sıralarına daxil oldu”.

Şirməmməd Əhmədov deyib ki, Aydın Əhmədov vətəninə sadiq gənc kimi həmişə onun təəssübünü çəkib və Avropadan Azərbaycana qara yaxmaq istəyən azərbaycanlılara da öz cavabını verib: “Avropada oturub Azərbaycanın dövlətçilik maraqları əleyhinə siyasət aparanların məqsədləri və məramları kifayət qədər bəllidir. Düşmənə işləməklə, erməni lobbisinin dəyirmanına su tökməkdən başqa bir niyyətləri yoxdur. Öz vətənini, dövlətini, xalqını sevən, hörmət bəsləyən heç bir kəs bu cür addımlara getməz”.

Şirməmməd Əhmədov deyib ki, oğlu daim mətbuat səhifələrində dövlətimizin inkişafı barədə açıqlamalar verib: “Bu gün dövlətimiz dünyada öz mötəbər yerini qorumaqla yanaşı, həm də tərəqqi edir, iqtisadi, sosial, mədəniyyət, idman və digər istiqamətlərdə öz sözünü deyir. Əlbəttə, bir ölkənin müstəqil siyasət yürütməsi bizləri sevməyənlərin qısqanclığına səbəb olur. Hələ də inana bilmirəm ki, belə fikirlərin sahibi olan oğlum, vətənini bu qədər sevən bir gənc bu gün dəmir barmaqlıqlar arasındadır”.

Son illər Azərbaycan dövləti ölkəmizə turistləri cəlb etmək üçün bir çox layihələrə imza atdığını söyləyən Şirməmməd Əhmədovun sözlərinə görə, oğlu turizm şirkətinin rəhbəri kimi də daim dövlətimizə fayda verən sahibkar olub: “Azərbaycan Prezidenti “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritə”sini təsdiq etdikdən sonra turistlərin sayında artım olub.

Aydın Əhmədov turizm şirkətinin rəhbəri kimi öz dəyərli fikirləri ilə yadda qalıb. Turizmlə bağlı beynəlxalq sərgilərdə, konfranslarda Azərbaycanı layiqincə dəfələrlə təmsil edib”.

Şirməmməd Əhmədov qeyd edib ki, oğlu turizm sahəsində ilk addımlarını BP-şirkətində başlamaqla atıb: “Aydın Əhmədov sahibkar olmaqla yanaşı, xeyriyyəçiliklə də məşğul olub. Daim uşaq evlərinə yardımlar edib. Bir çox layihələrin maliyyələşdirilməsinə dəstəyini göstərib”.

Qeyd edək ki, Aydın Əhmədovun atası Şirməmməd Əhmədov ömrünün 40 ilini Azərbaycan Dəmir Yolları sisteminə həsr edib, fəxri dəmiryolçudur.

O, hazırda Bakı Lokomativ Deposunda Həmkarlar İttifaqının sədri vəzifəsini icra edir.

Şirməmməd Əhmədov 2015-ci ildə isə Prezident tərəfindən tərəqqi medalı təltif olunub. 2018-ci ildə isə Azərbaycan Həmkarlar İttifaqı konfederasiyasının 25 illik yubiley döş nişanı ilə mükafatlandırılıb.


Müəllif: Hacı Zeynalov