"Qayğıkeş münasibətiniz bizi çox ruhlandırır" - Təşəkkür məktubları

Azərbaycan vətəndaşları koronavirus pandemiyasının Azərbaycanda geniş yayılmasının qarşısının alınması istiqamətində atdığı qətiyyətli addımlara, xalqımıza göstərdiyi diqqət və qayğıya görə Prezident İlham Əliyevə təşəkkür məktubları ünvanlayırlar.

Teleqraf.com Prezidentin rəsmi saytına istinadla həmin məktubları təqdim edir:

Şəkidə yaşayan müəllim, mədəniyyət işçisi Mənsurə Cəbrayılova hər kəsin xalq üçün böyük işlər görüldüyünün şahidi olduğunu vurğulayıb: "Dünyanı pis günə qoyan bu virusla mübarizədə və bütün işlərinizdə Sizə dualar edir və alqışlayırıq. Azərbaycan xalqına göstərdiyiniz diqqət və qayğıya görə Sizə minnətdarıq. Dövlətimizin qabaqlayıcı tədbirləri və düşünülmüş siyasəti nəticəsində bu gözə görünməyən virus, İnşallah ölkəmizi tərk edəcəkdir. Mən və ailəm Uca Allaha dualar edirik ki, Allah Sizə, həkimlərimizə, ordumuza, bu mübarizədə əməyi olan hər bir şəxsə dayaq olsun. Amin. Dəyərli Prezidentimiz, Biz Sizinlə güclüyük. Allah Sizə yar olsun".

Füzulidən yazan Vüsət Xəlilov aztəminatlı ailələrə göstərilən xüsusi qayğıya görə minnətdarlıq edib: "Əziz və möhtərəm Prezident. Bu ağır və çətin günlərdə bizim, sadə vətəndaşların yanında olduğunuza, xüsusi karantin müddətində işsiz və aztəminatlı ailələrə aylıq 190 manat pul vəsaitinin ödənilməsinə görə cəbhə bölgəsində yaşayan bütün Füzuli rayon sakinləri adından dərin minnətdarlığımızı bildiririk. Bir daha əmin olduq ki, Sizi özümüzə lider seçməkdə yanılmamışıq. Siz Ümummilli Liderimiz kimi mürəkkəb vəziyyətlərdə böyük iradə nümayiş etdirməklə xalqı irəli aparmağa qadir rəhbərsiniz və bizim xatirəmizdə daim belə qalacaqsınız. Allah yardımçınız olsun".

Sumqayıtdan məktub ünvanlayan Ləman Ramazanova vurğulayıb ki, vaxtında görülən tədbirlər sayəsində bu gün hamı evində sağlam şəkildə ailəsinin yanındadır: "Möhtərəm cənab Prezident. Koronavirus pandemiyasının ölkəmizdə geniş yayılmasına imkan vermədiyinizə görə Sizə minnətdarıq. Bu mübarizədə bir çox adamlar qəhrəmanlıq göstərir, bu qəhrəmanlıqlar bizi qələbəyə yaxınlaşdırır. Bu qələbədə nə qədər çox adamın payı olsa da bayraqdarımız, qələbənin memarı Sizsiniz, cənab Prezident. Allah Sizi xalqımızın üstündən əskik etməsin".

Bakıdan məktub göndərən Zəminə Cəfərova bildirib ki, ölkəmizdə COVİD-19 infeksiyasına qarşı görülmüş bütün qabaqlayıcı tədbirlər insanlarımızın sağlamlığının qarantıdır: "Möhtərəm cənab Prezident. Sizin müdrik siyasətinizin nəticəsi olaraq, Azərbaycan cənnət diyara çevrilmişdir. Qlobal pandemiyanın yayıldığı bir zamanda məhz Sizin rəhbərliyinizlə koronovirus ilə mübarizədə dövlət vaxtında qabaqlayıcı tədbirlər gördü. Bunun nəticəsidir ki, Azərbaycanda xəstələrin sayı da çox az oldu. Bu gün Siz bir daha sübut etdiniz ki, Azərbaycan xalqına xidmət edirsiniz. Sizin işsiz vətəndaşlara və sahibkarlara göstərdiyiniz maddi və mənəvi dəstək əsl rəhbər, dövlət başçısı qayğısının təzahürüdür. Bizim dəyərli Prezidentimiz, İnşallah, Sizin rəhbərliyinizlə Vətənimizdə həyat yenidən öz axarına düşəcək, toy-büsatlar qurulacaqdır. Siz xalqın etimadını qazanmış Lidersiniz. Ulu Tanrıdan Sizi və ailənizi qorumağı diləyirəm".

Şəkidə yaşayan Nemət Əliyev bütün vətəndaşların ölkə başçısının arxasında olduğunu qeyd edib: "Hörmətli Prezidentimiz. Bütün dünyanı bürüyən koronavirus xəstəliyinə qarşı mübarizədə respublikamızda Sizin rəhbərliyinizlə böyük işlər görülür. Biz hər gün televiziyada Sizin çıxışlarınızı diqqətlə dinləyirik. Sizin imzaladığınız qərarları hər gün eşidirik. Koronavirus xəstəliyi vaxtı kənd təsərrüfatı məhsulları istehsalçılarının xərclərini qarşılamaq məqsədilə ehtiyat fondunuzdan ayırdığınız vəsaitlərə, sadə kəndlilərin zəhmətinə verdiyiniz dəyərə görə sizə öz minnətdarlığımızı bildiririk".

Balakəndən İbrahim Şıxməmmədov COVID-19 pandemiyasının ölkəmizdə qarşısının alınması üçün qabaqlayıcı tədbirlər görüldüyünə görə təşəkkür edib: "Möhtərəm Prezident, cənab Ali Baş Komandan. Sizi salamlayır və bu məktubumda Sizə dərin təşəkkürümü bildirmək istəyirəm. Bu çətin günlərdə - ölüm kabusunun insanların aldığı hər nəfəsdə dolaşarkən xalqla birlikdə olduğunuza, İnanırıq ki, dünya tezliklə bu bəladan xilas olacaq, həyatımız əvvəlki axarına düşəcəkdir. Gördüyünüz bütün işlərə görə çox sağ olun, cənab Prezident. Bütün ailəmiz adından Sizə minnətdarıq. Yaxşı ki, varsınız. Nə yaxşı ki, bu ölkənin Prezidenti Sizsiniz. Allah Sizi və ailənizi qorusun".

Neftçalada yaşayan Heydər Səmədov fərdi sahibkar, fermer olaraq ölkə başçısının apardığı məqsədyönlü daxili və xarici siyasəti tam dəstəklədiyini vurğulayıb: "Cənab Prezident. Ölkəmizdə yeni növ koronavirus (COVİD-19) infeksiyasının genişlənməsi qarşısının alınması məqsədilə təsdiq etdiyiniz müvafiq preventiv və profilaktik tədbirlər, əhalinin aztəminatlı təbəqəsinin sosial dayanıqlığının təmin edilməsi, o cümlədən pandemiyadan əziyyət çəkən sahibkarlara maliyyə dəstəyi verilməsi, insanları sosial həmrəyliyə dəvət etməyiniz dövlət – vətəndaş birliyini əks etdirən əsas faktorlardandır. Sizin ölkəmizin çətin dönəmində dayanmadan, yorulmadan apardığınız islahatları alqışlayıram. Siz Azərbaycanın inkişafını təmin edirsiniz. Sizin pandemiya şəraitində Azərbaycanı necə qurtardığınız bir tarixdir. Yeni növ koronavirusun böyük insan tələfatı ilə nəticələnməsinin qarşısını almaq Sizin düşünülmüş, qabaqlayıcı tədbirlərinizin sayəsində mümkün olmuşdur. Fərdi sahibkar kimi sosial məsuliyyət dərk edərək Sizin bütün çağırışlarınızı tam şəkildə dəstəkləyirik".

Şamaxıdan məktun ünvanlayan Şəfa Hacıyeva bildirib ki, ölkəmiz koronovirus ilə bağlı aparılan mübarizədə zamanında verilmiş qərarlar sayəsində ən inkişaf etmiş dövlətlərlə bir pillədə durur: "Bu, dövlət rəhbərinin uzaqgörənliyinin nəticəsidir. Bizimlə bərabər ailəmizin, övladlarımızın rifahını düşündüyünüz üçün, bu çətin günlərdə virusun vurduğu ziyanları minimuma endirə bildiyiniz üçün Sizə ailəm və yaxınlarım adından dərin minnətdarlığımı bildirirəm. Sizin kimi rəhbəri olan dövlətin vətəndaşı olduğum üçün qürur duyuram. Hər zaman dövlətimizin rifahı naminə atacağınız qərarlarınızda yanınızdayam".

Tərtər Elşən Əsədov qeyd edib: "Hörmətli cənab Prezident. Azərbaycan xalqına vaxtında etdiyiniz güzəştlər, aztəminatlı ailələrin sosial durumlarını yaxşılaşdırmağa doğru atdığınız addımlar, işsiz və işaxtaran şəxslərə birdəfəlik ödəmələrin verilməsini 200 min nəfərdən 600 min nəfərə çatdırılması xalqımız üçün çox önəmli addımlardır. Vaxtında verdiyiniz göstərişlərə uyğun olaraq, dövlət sərhədlərinin bağlanılması xalqımız üçün çox önəmli addımdır. Biz həmişə Sizə güvənmişik və bu gündən sonra da güvənimizi sonsuz şəkildə davam etdirəcəyik. Biz fəxr edirik ki, Sizin kimi Prezidentimiz, ölkə başçımız, Ali Baş Komandanımız var. Cənab Ali Baş Komandan, mən Sizə ailəmiz adından minnətdarlığımı bildirirəm".

İsmayıllıdan Tatyana Ravçeyeva koronavirusla mübarizə istiqamətində həyata keçirilən tədbirlərin dövlət başçısının mərhəmətindən, sevgisinin dərinliyindən, təfəkkürünün gücündən və müdrikliyindən xəbər verdiyini vurğulayıb: "Hörmətli cənab Prezident. Siz həmişə olduğu kimi, bu çətin dövrdə də xalqın yanındasınız, ona daim qayğı göstərirsiniz. Sizin düşüncə və əməlləriniz insanların həyatının qorunmasına, onların sağlamlığının müdafiəsinə, maddi vəziyyətlərinin yaxşılaşdırılmasına yönəldilib. Ailəm adından və şəxsən öz adımdan Sizə - gözəl insan və müdrik rəhbərə öz xalqının qayğısına qaldığı üçün minnətdarlığımı bildirirəm. Əminəm ki, biz bu bəlanın öhdəsindən birlikdə gələcəyik. Biz daim Sizinləyik, biz birlikdə güclüyük! Allah Sizə cansağlığı versin, Sizi qorusun".

Masallıda yaşayan Füzuli Abdullayev bildirib: "Çox hörmətli cənab Prezident. Belə çətin günlərdə xalqımızın yanında olub, onun hər bir problemi ilə maraqlanıb həlli istiqamətində tapşırıqlar verdiyinizə görə mən bir Qarabağ qazisi kimi Sizi alqışlayıram. Xüsusilə də, koronavirusa qarşı mübarizədə vətəndaşlarımızın sağlamlığını hər şeydən vacib bilib məqsədəuyğun qərarlar verməyiniz bizi çox sevindirir. Hər çıxışınızda xalqımızın sağlamlığının Sizi nə qədər düşündürdüyünü, nə qədər narahat etdiyini hiss edirik. Xalqımızı, millətinizi bu qədər sevdiyinizə və önəm verdiyinizə görə Sizə minnətdarıq".

Ucardan məktub yazan Şamil Əliyev qeyd edib ki, dünyanı cənginə almış koronavirus pandemiyası ilə mübarizədə tibbin ən inkişaf etdiyi ölkələrin aciz qaldığı, çətin vəziyyətə düşdüyü halda, Prezident İlham Əliyevin uzaqgörən siyasəti nəticəsində Azərbaycanda səmərəli qabaqlayıcı tədbirlər görülüb: "Hörmətli Prezidentimiz, Siz Azərbaycan vətəndaşlarının, eləcə də şəhid ailələrinin sağlamlığının qorunması istiqamətində qətiyyətli addımlar atır, mühüm qərarlar qəbul edirsiniz. İnanırıq ki, Sizin müdrikliyiniz sayəsində xalqımız tezliklə bu bəladan xilas olacaqdır. Cənab Prezident, Azərbaycan vətəndaşı olmağımızla, Sizin kimi dövlət başçımızla qürur duyuruq. Uca Tanrı Sizi və ailənizi qorusun".

Bakıdan məktub ünvanlayan 91 yaşlı Roza Cəlilova dövlət başçısının ölkəmizin inkişafı, xalqımızın rifah halının yüksəldilməsi uğrunda apardığı düzgün siyasətin hər bir vətəndaşı hər zaman sevindirdiyini və fərəhləndirdiyini diqqətə çatdırıb: "Böyük ürəyinizlə bu çətin günlərdə xalqımıza göstərdiyiniz kömək və xeyirxah əməlləriniz əvəzolunmazdır, alqışlara layiqdir. Birlik – dirilikdir. Biz Sizin ətrafınızda sıx birləşərək böyük qüvvəyə çevriləcək və koronavirus pandemiyasının sınağından tezliklə alnıaçıq keçəcəyik. Mən 91 yaşımda buna ümid edirəm və inanıram. Cənab Prezident, Sizə tutduğunuz ali dövləti vəzifədə yeni uğurlar, möhkəm cansağlığı, uzun ömür, başda Siz olmaqla xalqımıza Ulu Tanrıdan kömək diləyirəm".

Zərdabdan Yasin Şıxlı bildirib ki, bütün dünya ölkələri koronavirus pandemiyasının qarşısında çətin durumda qaldığı halda, Azərbaycan vətəndaşı heç nədən korluq çəkmədən rahat yaşayır: "Sağlamlığımızı düşündüyünüzə, qayğımıza qaldığınıza görə Sizə təşəkkür edirik. Bir vətəndaş kimi, daim Sizi dəstəkləyir və Sizinlə qürur duyuruq. Allahdan Sizə uzun, sağlam ömür arzulayırıq".

Bakıdan Vaqif Mikayılov isə qeyd edib: "Möhtərəm cənab Prezident. Qəzetlərdən oxuyur, televiziyalardan görürük ki, koronavirus səbəbindən bütün dünya iflic vəziyyətindədir. İş yerləri bağlanıb, ölkə iqtisadiyyatları demək olar donub. Sizin pandemiyanın ilk günlərindən vəziyyəti düzgün qiymətləndirib çox ciddi tədbirlər görməyinizin nəticəsidir ki, bu gün ölkəmizdə insanlar bu virusun fəsadlarını demək olar hiss etmirlər. Azərbaycanımıza, xalqımıza sahib çıxdığınız üçün Sizə sonsuz təşəkkür edirəm. Bu məsuliyyətli fəaliyyətinizdə Sizə yeni uğurlar, cansağlığı və uzun ömür arzulayıram. Allah Sizi, Mehriban xanımı, övladlarınızı qorusun. Amin".

Ağdaşdan Bəhram Məmmədzadə deeyob: "Ölkəmizdə xüsusi karantin rejimini tətbiq edərək Azərbaycan xalqını qoruduğunuz və qayğısına qaldığınız üçün özümün və ailəmin adından Sizə təşəkkür edirəm.Şəfqət, mərhəmət, humanizm kimi keyfiyyətlər həmişə Sizin və Mehriban xanım üçün həmişə ən mühüm həyati dəyərlər olmuşdur. Bu gün də belədir. Bütün dünyada tüğyan edən koronavirus pandemiyası ilə mübarizədə Siz bu keyfiyyətlərinizi bir daha nümayiş etdirdiniz. Sizinlə fəxr edirik. Hər şeyə görə çox sağ olun".

Lənkəranda İmanverdi Ağayev qeyd edib ki, koronavirus təhlükəsi hazırda bütün dünyanı təhdid edir: "Bu, çox dəhşətli bəladır. Biz ölkə vətəndaşları Sizin rəhbərliyiniz ilə bu bəlaya qarşı görülən tədbirləri ürəkdən bəyənirik. Sizə təşəkkür edirik ki, bizi bu bəladan qorumaq üçün nə lazımdırsa edirsiniz. Xüsusilə ölkəyə gələn vətəndaşlar üçün yaradılan şəraitə, karantində olan insanlara göstərilən yüksək tibbi xidmətə və müalicəyə görə Sizə minnətdarlığımızı çatdırırıq.Cənab Prezident, Sizin və Mehriban xanımın qayğıkeş, humanist münasibətiniz bizi çox ruhlandırır. İnanırıq ki, hamımız sağlam və xoşbəxt olacağıq. Allah Sizi qorusun".

Bakıdan məktub ünvanlayan Zakir Mirzəyevin sözlərinə görə, Azərbaycan Prezidenti bir daha sübut edir ki, xalqımızın sağlamlığının keşiyində dayanıb, dövlətimizi bu çətin iqtisadi vəziyyətdən çıxarmağa qadirdir: "Dövlətimizin və xalqımızın üzləşdiyi bu çətin günlərdə vətəndaşlarımıza göstərdiyiniz yardıma və dəstəyə görə Sizə və Birinci vitse-prezident Mehriban xanım Əliyevaya ailəm adından və şəxsən öz adımdan dərin təşəkkürümü bildirirəm: Həm işsizlərə, həm də iş sahiblərinə dövlətin yardım əlini uzatması Sizin qayğıkeşliyinizin, mənəvi cəhətdən nə qədər zəngin təbiətə malik olduğunuzun göstəricisidir. Bu şərəfli vəzifədə Sizə yeni uğurlar və tükənməz enerji arzulayıram".

Gəncədə yaşayan Kəmalə Məmmədova xatırladıb ki, koronavirus pandemiyası bəşəriyyətə hücum edəcək, böyük ölkələri belə qarşısında diz çökdürür: "Sərhəd tanımayan bu virusa qarşı vaxtında məsuliyyətli və uzaqgörən davranmağınız xalqımızı böyük itkilərdən qorudu. Buna görə Sizə dərin minnətdarlıq bildiririk. Bu gün ölkəmiz pandemiya ilə mübarizədə dünyaya nümunədir. Əhalin sosial müdafiəsi ilə bağlı həyata keçirilən tədbirlər də vətəndaşların rifahını qoruyur. Vaxtında görülən tədbirlərə görə Sizə bir daha təşəkkür edir, “çox sağ olun” deyirik".

Saatlıdan məktub ünvanlayan Pünhan Əlizadənin sözlərinə görə, koronavirus pandemiyası dünya ölkələrinə, o cümlədən hegemon dövlətlərə müharibə elan edib, bütün ölkələrin iqtisadiyyatlarına güclü zərbə vurub: "Qlobal böhrana baxmayaraq, Sizin tədbirli siyasətiniz və qətiyyətli mövqeyiniz sayəsində Azərbaycanda vəziyyət nəzarət altında saxlanılır. Möhtərəm Prezident, əmin ola bilərsiniz ki, xalqımız Sizə inanır və yalnız Sizə güvənir. Əminik ki, Sizin müdrik rəhbərliyiniz sayəsində dövlətimiz bu vəziyyətdən qısa müddətdə mətanətlə çıxacaqdır. Nə xoşbəxtik ki, Vətənin bu çətin günündə daim xalqının yanında olan, ürəyi xalqı ilə döyünən Prezidentimiz var. Belə bir gündə Siz xalqımıza dayaqsınız. Bilin ki, biz də hər zaman Sizin arxanızdayıq".