Milli Məclisin komitəsi Qurtuluş Günü ilə əlaqədar onlayn konfrans keçirdi

Bu gün Milli Məclis sədrinin müavini, Gənclər və idman komitəsinin sədri Adil Əliyevin təşəbbüsü ilə 15 iyun-Milli Qurtuluş Günü münasibətilə gənclərlə onlayn konfrans keçirilib.

Teleqraf.com xəbər verir ki, konfransda parlamentin vitse-spikeri Adil Əliyevlə yanaşı, Gənclər və idman komitəsinin üzvləri Könül Nurullayeva, Şahin Seyidzadə, Etibar Əliyev, Jalə Əliyeva, habelə Milli Məclis Aparatının əməkdaşları, gənclər təşkilatlarının nümayəndələri də iştirak ediblər.

İclası açan Adil Əliyev ilk növbədə Milli Qurtuluş günü ilə əlaqədar təbriklərini çatdırıb. Vitse-spiker bu günün əbədiyaşar liderimiz Heydər Əliyevin adı ilə bağlılığı, xalqın xilaskarına çevrilən Ulu öndərin 1993-cü ilin 15 iyun tarixində xalqının səsini eşidərək hakimiyyətə qayıtması, bununla da müstəqil dövlətimizi dünya xəritəsindən silinmək təhlükəsindən xilas etməsi barədə fikirlərini bölüşüb.

Adil Əliyev Ulu öndərin bugünkü Azərbaycan Respublikasının memarı olmasını, onun böyük əməyi nəticəsində Azərbaycanın qısa zamanda regionun liderinə çevrilməsini, onun əsasını qoyduğu ideyaların bu gün cənab Prezident İlham Əliyev tərəfindən çox böyük uğurla davam etdirildiyini konfrans iştirakçılarının diqqətinə çatdırıb.

Onlayn tədbirdə çıxış edən millət vəkili Şahin Seyidzadə Milli Qurtuluş Gününün tarixi əhəmiyyətindən danışıb və bu əlamətdar gün münasibətilə iştirakçıları təbrik edib.

Millət vəkili Jalə Əliyeva öz çıxışında Ümumilli liderin hakimiyyətə qayıtması ilə ölkədə baş verən bütün özbaşınalıqlara son qoyulduğunu, müstəqil Azərbaycan dövlətinin onun gərgin əməyinin bəhrəsi olduğunu qeyd edib.

Onlayn konfransda çıxış edən deputat Könül Nurullayeva gənclərin Ulu öndər Heydər Əliyevin memarı olduğu müstəqil Azərbaycan Respublikasında yaşamalarından və Ulu öndərin siyasi kursunun uğurla davam etdirilməsindən böyük fəxarət hissi keçirdiklərini söyləyib.

Millət vəkili Etibar Əliyev isə Ulu öndərin xilaskarlıq missiyasından danışıb, onun siyasi irsinin gənc nəsil tərəfindən öyrənilməsinin vacibliyini diqqətə çatdırıb.

Sonra konfrans iştirakçıları Ümumilli liderin həyatı, onun ölkəmiz və xalqımız üçün gördüyü nəhəng işlər barədə fikirlərini bölüşüblər, tədbirin təşkilatçılarına minnətdarlıqlarını ifadə ediblər.

Tədbirin sonunda münsiflər heyəti Gənclər və idman komitəsinin Azərbaycan, rus və ingilis dillərində keçirdiyi “Ulu öndər Azərbaycan xalqının xilaskarıdır” adlı esse müsabiqəsinin qaliblərini elan edib.

Bununla da Gənclər və idman komitəsinin təşkilatçılığı və gənclərin iştirakı ilə keçirilən 15 iyun-Milli Qurtuluş Gününə həsr olunmuş onlayn konfrans başa çatıb.