Evdar qadınların sosial müdafiəsi ilə bağlı təkliflər təqdim edildi

Azərbaycanda evdar qadınların sosial müdafiəsi ilə əlaqədar siyasətə yenidən baxılmasına və mütərəqqi xarici təcrübənin tətbiqinə ciddi ehtiyac var.

Teleqraf.com xəbər verir ki, bu fikirlər QHT təmsilçiləri, müstəqil ekspertlər, dövlət orqanları nümayəndələrinin iştirakı ilə keçirilən “Azərbaycanda evdar qadınların sosial müdafiəsi problemləri və beynəlxalq təcrübə” mövzusunda dəyirmi masa müzakirələrində səsləndirilib.

Yanvarın 27-də keçirilən tədbirdə “Şəffaflıq Azərbaycan” Korrupsiyaya Qarşı Mübarizə” İB İcraçı direktoru Əliməmməd Nuriyev təşkilatın və “Uluçay” Sosial-İqtisadi İnnovasiya Mərkəzi İB-in Avropa İttifaqı və BMT İnsan Hüquqları üzrə Ali Komissarlığının (OHCHR) dəstəyi ilə icra etdiyi “Azərbaycanda uşaqların və həssas qadınların insanhüquqlarının monitorinqi və müdafiəsi” layihəsi barədə məlumat verib.

Layihə əlaqələndiricisi Zaur İbrahimli görülmüş işlərdən söz açıb. Layihə çərçivəsində qadınlara göstərilmiş hüquqi yardım barədə məlumat verib.

“Uluçay” Sosial-İqtisadi İnnovasiya Mərkəzi İB İcraçı direktoru İlyas Səfərli “Şəkidə boşanmış qadınların üzləşdikləri çətinliklər” mövzusunda aparılmış mikrotədqiqatın nəticələrini təqdim edib. “Şəffaflıq Azərbaycan” Korrupsiyaya Qarşı Mübarizə” İB İdarə Heyəti üzvü Rəna Səfərəliyeva “Azərbaycanda evdar qadınların sosial müdafiəsi problemləri və beynəlxalq təcrübənin tətbiqi imkanları” mövzusunda mövqe sənədini təqdim edib.

Tədbirdə vurğulanıb ki, bu gün ömrünün nəhsuldar dövrünü evadar qadın kimi keçiən, cəmiyyət üçün övladlar böyüdən qadınlar boşandıqda, yaxud fors-major hallar ilə üzləşdikdə sosial cəhətdən tamamilə müdafiəsiz vəziyyətdə qalırlar: "Bir qayda olaraq ailənin mənzili, evi evlilik rəsmiləşənə qədər əldə edilir, yaxud kişinin valideynlərinin sərəncamında olur. Qadın əmlaka iddia edə bilmir, uzun illər evdar qadın kimi fəaliyyəti isə onun əlverişli iş tapmasını çətinləşdirir, pensiyaya çıxdıqda isə yaşa görə yalnız pensiyaya ümid edə bilir. Nikah müqaviləsi bağlanması halları isə çox azdır. Hökumət bu real problemləri nəzərdən keçirməli və çıxış yolları tapmalıdır”.

“Azərbaycanda uşaqların və həssas qadınların insan hüquqlarının monitorinqi və müdafiəsi” layihəsi” çərçivəsində daha bir dəyirmi masa müzakirələri yanvarın 31-də keçirilib. QHT təmsilçiləri, müstəqil ekspertlər, dövlət orqanları nümayəndələrinin iştirakı ilə keçirilən tədbirdə Z.İbrahimov “Balakən rayonunda uşaqların üzləşdikləri zorakılıq halları” adlı mikrotədqiqatın nəticələrini təqdim edib. Tədqiqat layihənin dəstəyi ilə yerli ictimai fəallar tərəfindən aparılıb.
“Hüquqi Təhlil və Araşdırmalar” İB sədri Ramil İsgəndərli isə layihə çərçivəsində hazırlanmış “Uşaqlar üçün həssas ədliyyə yanaşması tətbiqinin inkişaf perspektivləri” adlı mövqe sənədini təqdim edib. Sənəddə yuvenal ədliyyə ilə bağlı Qərb ölkələrinin, Avropanın təcrübəsi ümumuləşmiş şəkildə analiz edilib və milli praktika ilə müqayisə edilib. Bu sahədə Azərbaycan üçün aktual olan məsələlər vurğulanıb və tövsiyyələr verilib.

Müzakirələrdə Ədliyyə Nazirliyi, ƏƏSMN, Ombudsman aparatının, Sosial Tədqiqatlar Mərkəzinin, Ailə, Qadın, Uşaq Problemləri üzrə Dövlət Komitəsinin nümayəndələri öz rəylərini bildiriblər və gələcək planlarla bağlı fikirlərini açıqlayıblar.

Ə.Nuriyev hər iki mövqe sənədi və mikrotədqiqatların “Şəfffalıq Azərbaycan”, Azərbaycan Açıq Platformasının saytlarında yerləşdiriləcəyini, bu sənədlər və tədqiqat nəticələri ilə əlaqədar müvafiq dövlət orqanları ilə müzakirələrin davam etdiriləcəyini bildirib.