9 Fevral 15:50
433
12 Punto 14 Punto 16 Punto 18 Punto

“Mərhum Prezident Heydər Əliyevin 25 yanvar 2003-ci il tarixli fərmanına əsasən “Şöhrət” ordeni ilə, Prezident İlham Əliyevin 2013-cü il 31 yanvar tarixli, 2686 saylı Sərəncamına əsasən “Şərəf” ordeni ilə təltif olunmuş, Azərbaycan Bəstəkarlar İttifaqının keçmiş üzvü, Respublikanın xalq artisti, professor, mərhum bəstəkar Mirzəyev Əlimusa Abdulla oğluna məxsus torpaq sahəsinə arayış verilməsinə dair müraciətə Daşınmaz Əmlakın Dövlət Reyestri Xidmətinin 1 saylı Bakı Ərazi İdarəsi tərəfindən süründürməçiliklə, laqeyd şəkildə yanaşıldığından 2022-ci ilin fevral ayından bugünədək iş öz həllini tapmamışdır”.

Teleqraf.com xəbər verir ki, bunu Gununsesi.info-ya açıqlamasında vəkil Yusif Allahverdiyev bildirib.

Vəkil bildirib ki, müvafiq dövlət orqanının süründürməçiliyi səbəbindən problemə yuxarı hakimiyyət orqanlarının reaksiya bildirməsini istəyir: “Ümid edirəm ki, İqtisadiyyat Nazirliyi bu özbaşınalığı aradan qaldıracaq”.

Vəkil açıqlamasında daha sonra əlavə edir: “Sabunçu rayonu, Ləhiş bağ massivində yerləşən 5576 nömrəli bağ sahəsinin görkəmli bəstəkar mərhum Mirzəyev Əlimusa Abdulla oğluna məxsus olmasına dair arayışın verilməsi tələbi ilə vəkil Y. Allahverdiyev tərəfindən 2022-ci ilin fevral ayında Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinin yanında Daşınmaz Əmlakın Dövlət Reyestr Xidmətinin 1 saylı Bakı Ərazi İdarəsinə müraciət olunsa da, qeyd olunan qurum tamamilə əsassız şəkildə müraciətin icrasından yayınmaqdadır.

Qeyd olunan arayışın verilməsi öhdəliyinin Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinin yanında Daşınmaz Əmlakın Dövlət Reyestr Xidmətinin 1 saylı Bakı Ərazi İdarəsinin üzərinə qoyulması tələbi ilə Bakı İnzibati Məhkəməsinə müraciət olunsa da cavabdeh öz qanunsuz hərəkətlərini bügünədək davam etdirməklə məhkəmə tərəfindən tələb olunan iş üzrə əhəmiyyət kəsb edən sənədlərin, mənfi və ya müsbət olmasında asılı olmayaraq tələb olunan mütəxəssis rəyinin təqdim edilməsindən yayınmaqdadır.

Belə başa düşülür ki, Azərbaycan Respublikasının mədəniyyətinə olan qatqısı və xidmətləri ölkə başçısı tərəfindən qiymətləndirilən mərhum Mirzəyev Əlimusa Abdulla oğlu Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinin yanında Daşınmaz Əmlakın Dövlət Reyestr Xidmətinin 1 saylı Bakı Ərazi İdarəsinin diqqətindən kənardadır”.

Qeyd edək ki, ötən il Müslüm Maqomayev adına Azərbaycan Dövlət Akademik Filarmoniyasında 29 yanvar 2022-ci il tarixində Xalq artisti, bəstəkar Musa Mirzəyevin 90 illik yubileyinə həsr olunmuş konsert təşkil edilmişdir.

Görünür, Əmlak Məsələləri Üzrə Dövlət Xidmətinin tabeçiliyində olan bir qurum isə Azərbaycan mədəniyyətinə, incəsənətinə tövhə verən mərhum xalq artistinin xatirəsinə “sayğısını” belə ifadə edir.


Müəllif: Teleqraf.com