Dövlət Miqrasiya Xidməti yanında İctimai Şura üzvləri ilə görüş keçirilib

Avqustun 22-də Dövlət Miqrasiya Xidməti (DMX) yanında İctimai Şuranın IV tərkibinin fəaliyyət müddətinin başa çatması ilə əlaqədar tədbir keçirilib. Tədbirdə Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynov çıxış edərək Dövlət Miqrasiya Xidməti tərəfindən həyata keçirilən genişmiqyaslı tədbirlər prosesində ictimai iştirakçılığın təmin edilməsinə və ictimai nəzarətə xüsusi önəm verildiyini bildirib. Bu istiqamətdə İctimai Şura ilə səmərəli əməkdaşlığın reallaşdırıldığını vurğulayıb.

Teleqraf.com xəbər verir ki, Vüsal Hüseynov son iki il ərzində İctimai Şuranın fəaliyyətinə diqqət çəkərək Şurada təmsil olunan 9 nəfərdən ibarət vətəndaş cəmiyyəti nümayəndələrinin işini müsbət dəyərləndirib və onlara gələcək fəaliyyətlərində uğurlar arzulayıb. Ötən dövr ərzində İctimai Şura ilə Dövlət Miqrasiya Xidmətinin sıx əməkdaşlıq etdiyini və dövlət orqanı ilə vətəndaş cəmiyyəti arasında “körpü” rolunu oynadığını vurğulayıb.

Qeyd edib ki, Dövlət Miqrasiya Xidməti yanında İctimai Şura fəaliyyəti dövründə mütəmadi olaraq miqrantlarla görüşlər keçirib, miqrantların qəbullarını təşkil edib, onların təkliflərini, problemlərini öyrənib Xidmətlə əlaqəli şəkildə həll edib.

Görüşdə çıxış edən DMX yanında İctimai Şuranın IV tərkibinin sədri Azər Allahverənov göstərilən dəstəyə görə minnətdarlığını bildirib, Şuranın iki illik fəaliyyətinə dair təqdimatla çıxış edib. Qeyd edib ki, İctimai Şuranın IV tərkibinin ümumilikdə 10 iclası keçirilib. Şuraya müraciət edən 366-a qədər əcnəbiyə hüquqi məsləhətlər verilib, zəruri texniki dəstəklər göstərilib, 94 nəfər miqrant üçün psixoloji məsləhətlər və seminarlar daxil olmaqla psixoloji terapiya tədbirləri keçirilib. Qeyd edilən dövrdə İctimai Şura üzvlərinin iştirakı və təmsilçiliyi ilə 35 tədbir reallaşdırılıb.

İctimai Şura üzvlərinin monitorinqlərin keçirilməsi fəaliyyəti çərçivəsində Xidmətin qanunsuz miqrantların saxlanılması mərkəzlərinə, həmçinin Gəncə, Xaçmaz və Şəki regional miqrasiya idarələrinə səfərləri təşkil olunub. Monitorinqlər zamanı mərkəzdə saxlanılan miqrantlarla İctimai Şura üzvləri tərəfindən fərdi görüşlər keçirilib, həmin şəxslərin saxlanılma şəraiti, rəftar, qida təminatı və digər məsələlərlə bağlı ictimai nəzarət həyata keçirilib.

Həmçinin İctimai Şuranın üzvləri onların fəaliyyəti üçün yaradılmış şəraiti qeyd edib, Xidmət tərəfindən həyata keçirilən tədbirlərin cəmiyyətdə rəğbətlə qarşılandığını bildiriblər.

Sonra İctimai Şuranın fəaliyyəti ilə bağlı video-icmal nümayiş olunub. Şura üzvlərinə Dövlət Miqrasiya Xidmətinin rəisi Vüsal Hüseynov tərəfindən Fəxri fərmanlar təqdim olunub.

Eyni zamanda Dövlət Miqrasiya Xidməti yanında İctimai Şuranın IV tərkibinin sədri Azər Allahverənov Şura ilə yaxından əməkdaşlıq edən media nümayəndələrini təltif edib.

Görüşdə həmçinin vətəndaş cəmiyyəti institutlarının üzvləri çıxış edərək İctimai Şuranın fəaliyyəti ilə bağlı fikirlərini bildiriblər.

Həmçinin DMX yanında İctimai Şuranın V tərkibdə iclası keçirilib. Xidmət rəisi Vüsal Hüseynov İctimai Şuraya seçilmiş üzvləri təbrik edərək onlara fəaliyyətlərində uğurlar arzulayıb.

Xidmət rəisi müraciət edənlərin məmnunluğunun, eləcə də şəffaflığın yüksək səviyyədə təmininin daim diqqət mərkəzində olduğunu və bununla bağlı qeyri-hökumət təşkilatları ilə əməkdaşlığa önəm verildiyini diqqətə çatdırıb.

O, İctimai Şuranın əvvəlki tərkibi kimi, yeni tərkibinin də respublikamızda miqrasiya proseslərinin tənzimlənməsi və təkmilləşdirilməsi istiqamətində, eləcə də maarifləndirmə proseslərində sıx əməkdaşlıq şəraitində uğurla fəaliyyət göstərəcəyinə, daim aktiv olacağına, rəy və təkliflərlə çıxış edəcəyinə ümidvar olduğunu bildirib.

DMX yanında İctimai Şuranın yeni sədri Ramil İskəndərli Xidmətin fəaliyyətini yüksək dəyərləndirərək, Şuranın gələcək planları barədə məlumat verib. O, Şuranın ötən illərdə formalaşmış müsbət idarəçilik ənənələrinin bundan sonra da davam etdiriləcəyini bildirib.

Sonra təkliflər dinlənilib və təşkilati məsələlərə baxılıb. İctimai Şura üzvlərinə yeni üzvlük vəsiqələri təqdim edilib.