Qəzada həlak olan 3 ekipaj üzvü və 21 sərnişinin cənazələri Bakıya gətiriləcək

Qazaxıstanın Aktau şəhəri yaxınlığında qəzaya uğramış təyyarədə həlak olan 3 ekipaj üzvü və 21 sərnişinin cənazələri Bakıya gətiriləcək.

Teleqraf.com xəbər verir ki, həlak olan şəxslərin cənazələrini daşıyan hava gəmisi axşam saatlarında Heydər Əliyev adına Beynəlxalq Hava Limanına enəcək.

Qeyd edək ki, dekabrın 25-də Bakıdan Çeçenistanın paytaxtı Qroznıya uçan Azərbaycan Hava Yollarına (AZAL) məxsus “Embrarer 190” tipli sərnişin təyyarəsi Qazaxıstanın Aktau şəhərindən bir neçə kilometr aralıda qəzaya uğrayıb.

Hava gəmisində Azərbaycan, Rusiya, Qırğızıstan və Qazaxıstandan olan 62 sərnişin, həmçinin 5 ekipaj üzvü olub.

Qəza nəticəsində 38 nəfər ölüb, 29 nəfər, o cümlədən 2 ekipaj üzvü sağ qalıb. Yaralılardan bəzilərinin vəziyyəti ağırdır.

Faktla bağlı Azərbaycan və Qazaxıstanda cinayət işi açılıb. Hər iki ölkənin hökumətləri təyyarə qəzasının səbəblərini araşdırmaq üçün komissiyalar yaradıb. Sahə tədqiqatları Azərbaycanın aviasiya administrasiyası ilə əməkdaşlıq çərçivəsində aparılır.