Buraxılış imtahanlarının nəticələri elan olunub

Tələbə Qəbulu üzrə Dövlət Komissiyası (TQDK) tərəfindən bu il martın 13-də respublikanın peşə liseylərinin sonuncu sinfində təhsil alan şagirdlər üçün keçirilmiş buraxılış imtahanlarının nəticələri elan olunub.

TQDK-dan Teleqraf.com-a bildiriblər ki, imtahanın nəticələri bu qurumun internet səhifəsində yerləşdirilib.

Peşə liseylərində keçirilmiş buraxılış imtahanlarında ana dili və riyaziyyat fənlərinin hər biri üzrə ayrılıqda test tapşırıqlarına verdiyi düzgün cavablarının sayı 8-dən, xarici dil və ya kimya fənnindən 7-dən az olmayan şagirdlər müvəffəq qiymət alırlar.

Peşə liseyləri şagirdlərinin fənlər üzrə düzgün cavablarının sayının 5 ballıq şkalasına (2, 3, 4, 5) uyğunluğu müvafiq cədvəldə təqdim olunur. Həmin cədvəl TQDK-nın internet saytında verilib.