“Rabitə işin”də təqsirləndirilənlərdən birinin səhhəti pisləşdi - MƏHKƏMƏ

Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin keçmiş Aparat rəhbəri Vidadi Zeynalov, “Aztelekom” MMC-nin sabiq baş direktoru Məhəmməd Məmmədov, İstehsalat Birliyinin sabiq rəhbəri Beytulla Hüseynov, “Bakı Telefon Rabitəsi” İstehsalat Birliyinin sabiq baş mühasibi Anar Mustafayev, “AzİnTelekom” MMC-nin sabiq baş direktoru Cəlil Cəfərov, “Azərpoçt” MMC-nin sabiq baş direktoru Qəmbər Bəybalayev, “Optik Rabitə, Tikinti və Quraşdırma” MMC-nin baş mühasibi Səhrab Hümbətov, “Rabitə Mülki Tikinti” MMC-nin direktoru Emin Məmmədov, “Aztelekom” MMC-nin baş mühasibi Oqtay Rüstəmov, “Təmir Təchizat Servis” MMC-nin direktoru Bayram Vəliiyev və "Optik Qurğular" İdarəsinin sabiq rəisi Namazalı Məmmədovun cinayət işi üzrə məhkəmə prosesi davam edib.

Teleqraf.com-un məlumatına görə, hakim Əfqan Hacıyevin sədrlik etdiyi proses hava şəraiti ilə bağlı vaxtında başlamayıb.

Təqsirləndirilən şəxslər məhkəməyə gec gətirilib. Prosesdə həmçinin məlum olub ki, təqsirləndirilən Oktay Rüstəmovun səhhətində problemlər yaranıb, bu səbəbdən onun məhkəməyə gətirilməsi mümkün olmayıb.

Hakim təqsirləndirilən şəxsin xəstə olması ilə bağlı prosesi təxirə salıb.

Proses fevralın 22-də davam edəcək.

Hacı Zeynalov