Qaxda narkotik bağbanın tutulması üçün xüsusi - Əməliyyat/Foto

Qax rayon polis şöbəsi əməkdaşlarının keçirdikləri əməliyyat tədbiri nəticəsində narkotiklərin qanunsuz dövriyyəsi, satışı və kultivasiyası ilə məşğul olan şəxs saxlanılıb.

Teleqraf.com xəbər verir ki, polis şöbəsinə daxil olmuş məlumat əsasında Qax rayonu Tasmalı kənd sakini Ümidvar Yusifovun kəndin ərazisindəki bağ sahəsində əməliyyat-axtarış tədbiri keçirilib.

Tədbir zamanı Ümidvar Yusifov bağ sahəsində əkdiyi çətənə kollarına qulluq edərkən yaxalanıb. Polis əməkdaşlarının həmin əraziyə baxış keçirdikləri zaman oradan 310 ədəd narkotik tərkibli bitki hesab edilən çətənə bitkisi kolları aşkar olunaraq götürülüb. Saxlanılan şəxs ilkin ifadəsində narkotik vasitəni satmaq məqsədilə əkdiyini bildirib.

Faktla bağlı araşdırma aparılır.