Əsgərliyə getməyə hazırlaşan gənci qətlə yetirənə – Ağır cəza

Bakıda qətl törətməkdə təqsirləndirilən 1975-ci il təvəllüdlü Ərəstun Ərəbovun cinayət işi üzrə məhkəmə prosesi başa çatıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Novruz Kərimovun sədrliyi ilə baş tutan prosesdə təqsirləndirilən şəxsə hökm oxunub.

Ərəstun Ərəbov 17 il müddətinə azadlıqdan məhrum edilib.

İttihama görə, qətl hadisəsi ötən ilin iyulunda Nəsimi rayonu 3-cü mikrorayon qəsəbəsində baş verib.

Ərəstun Ərəbov metal qəbulu sexində işləyən Bərdə rayonunda məskunlaşan Laçın rayonundan məcburi köçkün, 1997-ci il təvəllüdlü Qafar Hüseynovu küt alətlə vuraraq qətlə yetirib.

Hadisəyə səbəb kimi tərəflər arasında yaranmış mübahisə göstərilir. Ərəstun Ərəbov mərhumu söyüş söydüyünü görə vurduğunu iddia edir.

Mərhumun yaxınları isə Ərəstun Ərəbovun içkili olduğunu, bir səbəb olmadan Qafar Hüseynovu öldürdüyünü deyib.

Yaxınlarının dediyinə görə, qətlə yetirilən Qafar Hüseynov 3 gün sonra hərbi xidmətə yollanacaqmış.