Prokuror “Range Rover”lə qəza törədən polisə yenidən cəza istədi

Bakıda ölümlə nəticələnən yol-nəqliyyat hadisəsi törətməkdə təqsirləndirilən polis serjantı Xəyal Məmmədovun cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Mirzə Xankişiyevin sədrliyi ilə baş tutan prosesdə əlavə şahidlər dindirilib.

Əlavə şahidlərin dindirilməsi başa çatdıqdan sonra məhkəmə istintaqı tamamlanıb və çıxış etmək üçün prokuror Sabir Abdinova söz verilib.

Prokuror Xəyal Məmmədovun əməlinin məhkəmədə tam sübuta yetirildiyini deyib və onun 7 il 6 ay müddətinə azadlıqdan məhrum edilməsini təklif edib.

Növbəti proses iyunun 25-də davam edəcək.

Qeyd edək ki, bundan əvvəl keçirilən prosesdə prokuror çıxış etmişdi və Xəyal Məmmədovun 7 il müddətinə azadlıqdan məhrum edilməsini təklif etmişdi.

Amma müdafiə çıxışları ərəfəsində təqsirləndirilən şəxsin vəkili məhkəmə istintaqının təzələnməsini, cinayət işinin ibtidai istintaqını aparan müstəntiqin əlavə şahid qismində dindirilməsi barədə vəsatət vermişdi.

Məhkəmə vəsatəti təmin etmişdi.
İttihama görə, ötən il iyunun 12-də Binəqədi qəsəbəsi ərazisində naməlum sürücünün idarə etdiyi “Range Rover” markalı avtomobillə Rahib Əliyevin “Ford” markalı avtomobili toqquşub.

Qəza nəticəsində “Ford”un sürücüsü və sərnişini - Orxan Orucovla Rahib Əliyev hadisə yerində ölüb.

Məlum olub ki, qəza baş verən zaman “Range Rover”in sükanı arxasında Abşeron Rayon Polis İdarəsinin əməkdaşı, çavuş Xəyal Məmmədov olub. O, dərhal saxlanılıb və məhkəmənin qərarı ilə barəsində həbs qətimkan tədbiri seçilərək istintaqa təhvil verilib.