16 Sentyabr 2014 11:59
1 401
12 Punto 14 Punto 16 Punto 18 Punto

“Azərbaycan Respublikası DİN-nin Baş Mütəşəkkil Cinayətkarlıqla Mübarizə İdarəsinin İstintaq şöbəsinin baş müstəntiqi polis mayoru Əliyev İsrayıl İsrayıl oğlu Mirzəyev İlham Əlikram oğlunun Azərbaycan Respublıkasının CM-nin 178.2.2, 178.2.3 və 178.2.4-cü maddələri ilə təqsirləndirilməsinə dair 1419000153 nömrəli cinayət işinin ibtidai araşdırmaya prosessual rəhbərliyi həyata keçirən prokurora göndərilməsi üçün toplanmış sübutların kifayət olduğunu hesab edərək Azərbaycan Respublikası CPM-nin 289-cu maddəsini rəhbər tutub, hazırkı ittiham aktını tərtib etdim. Həmin cinayət işi 10 aprel 2014-cü il tarixdə tərəfimdən faktlara görə Azərbaycan Respublikası CM-nin 178.2.4-cü maddəsi ilə başlanmış və icraatıma qəbul edilərək ibtidai istintaqı aparılıb”.

Əvvəli bu linklərdə:
http://publika.az/p/41707
http://publika.az/p/42157


DİN-nin Baş Mütəşəkkil Cinayətkarlıqla Mübarizə İdarəsinin əməliyyatçısı: “...İlham Mirzəyev iş otağında əyləşdiyi stolun sağ tərəfindəki dördgözlü siyirtmə şkafın yuxarıdan ikinci gözünü açaraq oradan 14 ədəd 100-lük avro pul əsginazlarından ibarət cəmi 1400 avro məbləğində pulları əməliyyatçılara təqdim edib”.

Xəbər verildiyi kimi, neçə gün əvvəl Nərimanov Rayon Məhkəməsində teleaparıcı İlham Mirzəyevin barəsində başlanmış cinayət işi üzrə məhkəmənin hazırlıq iclası keçirilib... İ.Mirzəyevin hüquqlarını isə vəkillər Xanlar Bayramzadə və İkram Abdullayev müdafiə edir. Qeyd etdiyimiz kimi, “Təzadlar” İlham Mirzəyevin törətdiyi cinayət əməlini əks etdirən İttiham Aktını əldə edib. Aşağıda həmin sənədin 3-cü hissəsini təqdim edirik:

İTTİHAM AKTI

“Azərbaycan Respublikası DİN-nin Baş Mütəşəkkil Cinayətkarlıqla Mübarizə İdarəsinin İstintaq şöbəsinin baş müstəntiqi polis mayoru Əliyev İsrayıl İsrayıl oğlu Mirzəyev İlham Əlikram oğlunun Azərbaycan Respublıkasının CM-nin 178.2.2, 178.2.3 və 178.2.4-cü maddələri ilə təqsirləndirilməsinə dair 1419000153 nömrəli cinayət işinin ibtidai araşdırmaya prosessual rəhbərliyi həyata keçirən prokurora göndərilməsi üçün toplanmış sübutların kifayət olduğunu hesab edərək Azərbaycan Respublikası CPM-nin 289-cu maddəsini rəhbər tutub, hazırkı ittiham aktını tərtib etdim. Həmin cinayət işi 10 aprel 2014-cü il tarixdə tərəfimdən faktla görə Azərbaycan Respublikası CM-nin 178.2.4-cü maddəsi ilə başlanmış və icraatıma qəbul edilərək ibtidai istintaqı aparılmısdır”.

...Cinayət işi üzrə şübhəli şəxs qismində dindirilmiş Mirzəyev İlham Əlikram oğlu ifadəsində göstərmişdir ki, 10 yanvar 2014-cü il tarixdən etibarən Bakı şəhəri, Nərimanov rayonu, İ.Dadaşov küçəsi 57 ünvanında yerləşən özünə məxsus 247 kvadrat metr sahəsi olan qeyri-yaşayış sahəsində Vergilər Nazirliyi, Səhiyyə Nazirliyi və Sosial Müdafiə Fondundan qeydiyyatdan keçirərək “İlhaMed” tibb mərkəzini açmış, tibb mərkəzinin təsisçisi və direktoru özüdür. O, tibb mərkəzində vətəndaşlara psixoloji yardım göstərməklə məşğul olur. Orada yerləşən digər otaqlarda isə ali təhsilli mütəxəssislər tərəfindən psixoloq, massajist, fizioterapiya və ultrasəs müayinəsi təşkil olunmuşdur. Qəbul zamanı vətəndaşlara pullu xidmət göstərilir. Həmin xidmətlərin qiyməti respublikada bu sahədə mövcud qiymətlərə uyğun ümumi qaydalara əsasən müəyyən edilmişdir. Qəbula gələn vətəndaşlar qəbul şöbəsində qeydiyyatdan keçərək, əvvəlcədən göstəriləcək xidmətlərə görə ödənişlərini xəzinədara ödəyərək, mütəxəssislərin qəbuluna buraxılır. Barəsində şikayət etmiş A. (Ad şərtidir - red.) təxminən bir həftə əvvəl iki dəfə onun qəbulunda olmuş, onun tərəfindən psixoloji yardım göstərilmiş və hər dəfə 50 AZN xidmət haqqı ödəmişdir. Sonrakı günlərdə A. 2-3 dəfə tibb mərkəzinə gələrək onun qəbulunda olmuş, həmin ərəfədə dəfələrdə işi olduğunu bildirmiş, tələsdiyi üçün heç bir ödəniş etmədən çıxıb getmiş və demişdir ki, göstərdiyi psixoloji yardıma görə ödənişin hamısını birdəfəlik ödəyəcəkdir. Əvvəlki dəfələrdə A. stresslə bağlı müraciət etmiş və ağlayaraq dörd aydır ki, anasını itirdiyini, göz yaşları içində boğula-boğula özünə qəsd etmək istədiyini, həyatın mənasız olduğunu demiş, o isə saatlarla A. ilə məşğul olaraq intihar etməməsini, Allaha sığınıb səbr etməsini məsləhət görmüş və ona psixoloji yardım etmişdir. Sonra isə onun yanına gələrək demişdir ki, “mən sakitləşdim və bununla barışdım. Amma məni sevən oğlan mənə qarşı laqeyddir, təmamilə məndən soyuyub, əgər o mənimlə heç olmasa, bir az mehriban olarsa, mən hər şeyi unudaram”.

“Əvvəlki və gələcəkdə göstərəcəyim psixoloji xidmət də daxil olmaqla 3 min Avro verərsən, sənə köməklik edərəm”

Beləcə, 09 aprel 2014-cü il tarixdə A. yanına gələrək bildirmişdir ki, yaxın münasibətdə olduğu Ç. adlı şəxslə münasibətlərinin bərpa olunmasına, barışmasına köməklik etsin. O, A.-ya demişdir ki, “özünün və Ç.-in şəkillərini mənə gətir. Əvvəlki və gələcəkdə göstərəcəyim psixoloji xidmət də daxil olmaqla 3 min Avro verərsən, sənə köməklik edərəm”. A. onunla razılaşmış, həmin tarixdə günortadan sonrakı saatlarda A. iş otağına gələrək özünün və Ç.-in iki ədəd ayrıca fotoşəkillərini və 1600 Avro pulu ona vermişdir. Pullar 500, 100 və 50-lik avro pullardan ibarət olmuşdur. A. qalan 1400 avro pulu sabahı gün gətirəcəyini bildirmişdir. O, A.-dan özünün və Ç. adlı şəxsin fotoşəkillərini götürsə də, fotoşəkillərlə bağlı heç bir addım atmayacaqdı, fotoşəkillərdən heç bir məqsədlə istifadə etməyəcəkdi. 10 aprel 2014-cü il tarixdə, saat 15:30 radələrində A. iş otağına gəlmiş və 14 ədəd 100-lük avro olmaqla, cəmi 1400 Avro pulu ona vermişdir. O, A.-a bildirmişdir ki, hər şey yaxşı olacaq, köməklik edəcəkdir. A. iş otağından çıxdıqdan sonra otağa mülki geyimli şəxslər daxil olmuş, vəsiqələrini təqdim edərək, polis əməkdaşları olduqlarını bildirib, əllərində qərar olduğunu demişlər və hal \şahidlərinin iştirakı ilə iş otağına baxış keçirmişlər. Polis əməkdaşları ondan A.-nı tanıyıb-tanımadığını və ondan pul alıb-almadığını soruşmuşlar. O, polis əməkdaşlarına bir qədər əvvəl A.-dan 1400 avro aldığını bildirərək, otağında əyləşdiyi stolun sağ tərəfindəki siyirtmə şkafın yuxarıdan ikinci gözündən həmin 14 ədəd 100-lük Avro pulları polis əməkdaşlarına təqdim etmiş və pulları kağız zərfə qoyub qablaşdırmışlar. Sonda bu barədə protokol tərtib olunmuş, protokol ucadan oxunmuş, o və digər iştirakçılar protokolu imzalamışlar. Sonradan o, DİN-nin Baş Mütəşəkkil Cinayətkarlıqla Mübarizə İdarəsinə dəvət olunmuş və sərbəst yazdığı izahatında A.-dan 3000 Avro aldığını qeyd etmiş və könüllü surətdə bir gün əvvəl A.-dan aldığı 1600 avro pulu və iki ədəd rəngli fotoşəkli polis əməkdaşlarına təqdim etmişdir.

İbtidai istintaq zamanı zərərçəkmiş şəxs A. və şübhəli şəxs Mirzəyev İlham Əlikram oğlu arasında üzləşdirmə keçirilmiş, üzləşdirmə A. əvvəlki ifadəsində göstərdiklərini İlham Mirzəyevin üzünə qarşı bir daha səsləndirmiş, sonuncu isə öz növbəsində zərərçəkmiş şəxs A.-nın üzləşdirmə zamanı hadisənin baş vermə şəraiti və mexanizmi ilə bağlı verdiyi ifadəsini təsdiq etmişdir.

Cinayət üzrə təqsirləndirələn şəxs qismində dindirilmiş Mirzəyev İlham Əlikram oğlu ifadəsində həmçinin göstərmişdir ki, 1986-cı ildə Əli-Bayramlı şəhər sənaye texnikumunun “Mülki tikintilər” fakültəsini texniki inşaatçı üzrə, 1995-ci ildə Azərbaycan Dövlət Mədəniyyət və İncəsənət Universitetinin “Teatr aktyoru” fakültəsini bitirmişdir. Sonradan dəqiq xatırlamadığı vaxtda 1 il müddətində Azərbaycan Müəllimlər İnstitutunun ixtisas dəyişmə kursunu bitirmiş və psixoloq ixtisasına yiyələnmişdir. 2004-cü ildən etibarən Azərbaycan Milli Elmlər Akademiyasının Fəlsəfə və Hüquq İnstitutunda kiçik elmi işçi, elmi işçi, böyük elmi işçi vəzifələrində çalışmış, hazırda həmin institutda aparıcı elmi işçi vəzifəsində çalışır. Bununla yanaşı, müqavilə əsasında “Space” telekanalında aparıcı işləyir. Əvvəllər “Space” telekanalında “Tale yolları” verilişinin müəllifi və aparıcısı olmuş, hazırda isə həmin telekanalda “Etiraf” və “Etibar edin” verilişinin təsisçi və aparıcısıdır. 2004-cü ildən Azərbaycan Milli Elmlər Akademiyasının Fəlsəfə və Hüquq İnstitutunun Sosial psixoloji şöbəsində psixologiya sahəsində elmi fəaliyyətə başlamış, 2006-cı ildə “Posttravmatik stresslərin sosial-psixoloji təhlili” adlı dissertasiya işini müdafiə edərək, psixologiya üzrə fəlsəfə doktoru elmi adına yiyələnmişdir. Bu günədək psixologiya sahəsində 8 monoqrafiyanın, 70 elmi məqalənin müəllifidir. Təxminən 5 il əvvəl “Tanrı” Elmi-İstehsalat Firmasını təsis etmişdir. Firmanın hüquqi ünvanı özünün yaşayış qeydiyyatında olduğu ünvan, yəni Bakı şəhəri, Nizami rayonu, B.Nuriyev küçəsi, ev 51-dəki mənzilidir. 30 oktyabr 2009-cu il tarixdə Azərbaycan Respublikası Səhiyyə Nazirliyi tərəfindən təsisçi və direktoru olduğu “Tanrı” Elmi-İstehsalat Firmasına Bakı şəhəri, Nərimanov rayonu, İbrahimpaşa Dadaşov küçəsi 57 ünvanında tibb fəaliyyətinin həyata keçirilməsinə icazə verilməsi haqqında 026003 nömrəli lisenziya verilmişdir. 10 yanvar 2014-cü il tarixdə o, özünəməxsus Bakı şəhəri, Nərimanov rayonu, İbriahimpaşa Dadaşov küçəsi 57 ünvanında yerləşən 247 kvadrat metr sahəsi olan qeyri-yaşayış sahəsində təsisçi və direktoru olduğu “Tanrı” Elmi-İstehsalat Firmasının nəzdində “İlhaMed” tibb mərkəzini açmış və həmin vaxtdan etibarən tibb mərkəzi fəaliyyət göstərmişdir. Belə ki, tibb mərkəzinin direktoru özüdür, mərkəzin baş həkimi İbrahimova Gülər Arif qızıdır. “İlhaMed” tibb mərkəzində uşaq psixoloqu, surdoloq, kəkələmə mütəxəssisi, böyüklər üçün psixoloq, nevropotoloq, psixoterapevt, ultrasəs müayinə həkimi, fizioterapiya və massaj xidmətləri fəaliyyət göstərmişdir. “İlhaMed” tibb mərkəzində vətəndaşlara ödənişli xidmət göstərilir və tibbi xidmət üçün ödənilən məbləğlər razılaşma yolu ilə müəyyən olunur, konkret qiymətlər müəyyən olunmamışdır.

“İlham Mirzəyev psixoloq olaraq müraciət etmiş vətəndaşları tibb mərkəzindəki özünün əyləşdiyi otaqda qəbul edərək, onlara psixoloji yardım göstərib”

Psixoloq olaraq onun qəbuluna gələn böyüklər üçün 50 manat, uşaqlar üçün isə 25-30 manat ödəniş alınmışdır. O, özü şəxsən “İlhaMed” tibb mərkəzində psixoloji yardım üçün müraciətlər etmiş pasientlərdən göstərdiyi psixoloji yardım xidmətinə görə əlbəəl pul almamış, pasient onun qəbuluna gələnə kimi artıq tibb mərkəzindəki qeydiyyat şöbəsində qeydiyyatdan keçmiş, birdəflik qəbul üçün nəzərdə tutulmuş 25-50 manat pulu ödəmiş, pasientə qəbz verilmişdir. Yalnız bundan sonra pasient qəbul şöbəsindən pulu ödəməsinə dair verilmiş qəbzlə onun qəbuluna gəlmiş, o, həmin pasienti direktor otağında qəbul etmişdir. Pasient qəbzi ona göstərmiş və o, pasienti qəbul etmişdir. Psixoloq olaraq o, müraciət etmiş vətəndaşları tibb mərkəzindəki özünün əyləşdiyi otaqda qəbul etmiş, onlara psixoloji yardım göstərmişdir. Göstərdiyi psixoloji yardımın mahiyyəti bundan ibarətdir ki, vətəndaş ona müraciət etdikdə, psixoloq olaraq onu ilk növbədə dinləmiş, onu narahat edən məsələnin probleminin nədən ibarət olduğunu araşdırmışdır. Təxminən 8-9 gün əvvəl dəqiq xatırlamadığı tarixdə günortadan sonrakı saatlarda “İlhaMed” tibb klinikasına əvvəllər tanımadığı adını sonradan bildiyi A. pasient kimi gəlmiş və ona müraciət etmişdir. A. hamı kimi qəbula gələrkən 50 manat psixoloji yardıma görə xidmət haqqını ödəmiş və bundan sonra onu direktor otağında qəbul etmişdir. A. qəbuluna gələrkən 4 ay əvvəl anasının xərçəng xəstəliyidən dünyasını dəyişdiyini, anasının vəfatı ilə barışa bilmədiyini danışmış, göz yaşları içərisində boğula-boğula özünü öldürmək istədiyini bildirmişdir.

O, psixoloq olaraq A.-ya təsəlli vermiş, ondan ailəsi barədə sorğu-sual etmiş, ona izah etmişdir ki, anasının vəfatı ilə barışmalıdır. Allaha sığınmaq lazımdır, anası ağır xəstə olub, uzun müddət yataqda yatsa idi, o, buna dözə bilməzdi. O, həmin pasientə özünəqapanma, depressiya və intihara meyillilik diaqnozu müəyyən etmiş və onun üçün 30 günlük psixoloji seans keçməsini məsləhət görmüşdür. Hətta A.-nı tibb mərkəzində fəaliyyət göstərən şüa-diaqnostika aparatına göndərmişdir ki, orada beyni aparata salınsın. Şüa-diaqnostika aparatına baxan həkim Mətanət xanım bildirmişdir ki, A.-nın beynində heç bir problem yoxdur və beləcə, onun qoymuş olduğu diaqnoz düzgün çıxmışdır. Sabahı gün, günortadan sonrakı saatlarda A. növbəti dəfə “İlhaMed” tibb mərkəzinə gələrək, bu dəfə də 50 manat birdəfəlik qəbul üçün ödəniş haqqını ödədikdən sonra onun qəbulunda olmuş, o A. ilə şifahi söhbət aparıb ona psixoloji yardım göstərmişdir.

Növbəti günlərdə də, 2-3 dəfə A. “İlhaMed” tibb mərkəzinə gələrək qəbulunda olmuş, həmin vaxt onu otağında qəbul edib psixoloji yardım göstərmişdir. Bu dəfəki gəlişləri zamanı isə A. qəbul şöbəsində qəbul üçün 50 manat ödəniş etməmiş və bildirmişdir ki, tələsir, ödənişlərin hamısını birdəfəlik ödəyəcəkdir. O, buna etiraz etməmmiş və beləcə, növbəti 2-3 gündə A.-nı qəbul etmiş, ona psixoloji yardım göstərmişdir.

“Növbəti dəfə, 10 aprel 2014-cü il tarixdə günortadan sonra, təxminən saat 15-16 radələrində A. “İlhaMed” tibb mərkəzinə onun otağına gəlmiş, otaqda A. özünün və sevdiyi şəxsin ayrı-ayrılıqda iki ədəd rəngli fotolarını, bir də 14 ədəd 100-lük avro pul əskinazlarından ibarət 1400 Avro pulu ona vermişdir”

Növbəti gəlişlərinin birində A. özü haqqında danışarkən bildirmişdir ki, onun bir nəfər kişi tanışı vardır, həmin şəxs ailəlidir, həmin şəxs ona həmişə maddi yardım göstərmişdir, hətta anasının müalicəsi üçün də ona yardım göstərmişdir, lakin son vaxtlar münasibətləri soyumuşdur, əgər həmin şəxs yenidən onunla yaxın münasibətdə olsa, özünü yaxşı hiss edər. O, A.-dan bu şəxsin kim olduğunu, həmin şəxs evlidirsə, nəyə görə onunla münasibətdə olduğunu soruşmuş və A.-ya demişdir ki, “həmin şəxsin şəklini gətir, bir baxım görüm kimdir”. Növbəti dəfə, 10 aprel 2014-cü il tarixdə günortadan sonra, təxminən saat 15-16 radələrində A. “İlhaMed” tibb mərkəzinə onun otağına gəlmiş, otaqda A. özünün və sevdiyi şəxsin ayrı-ayrılıqda iki ədəd rəngli fotolarını, bir də 14 ədəd 100-lük avro pul əskinazlarından ibarət 1400 Avro pulu ona verib bildirmişdir ki, “bu pullar 30 günlük seansın puludur, hamısını birlikdə verirəm, məndə milli pul olmadığı üçün pulu Avro ilə verirəm”. O, ödənişi manatla etməsini söyləmiş, lakin A. bildirmişdir ki, tələsir, onda milli pul olmadığı üçün Avro ilə verir. O, həmin 14 ədəd 100-lük avro pulu A.-dan götürüb oturduğu stolun sağ tərəfindəki şkafın yuxarıdan ikinci siyirtməsinə qoymuş, düşünmüşdür ki, həmin 1400 Avro pulu sonradan Azərbaycan manatına çevirər və tibb mərkəzinin kassasına mədaxil edər. A. tələsdiyini söylədiyi üçün həmin gün ona psixoloji yardım göstərməmiş, A. pulu və iki ədəd rəngli fotoşəkilləri ona verdikdən sonra çıxıb getmişdir. A. otaqdan çıxdıqdan ani vaxt sonra otağına mülki geyimli şəxslər gəlmişlər. Həmin şəxslər özlərini təqdim edərək, Azərbaycan Respublikası Baş Mütşəkkil Cinayətkarlıqla Mübarizə İdarəsinin əməkdaşları olduqlarını, A.-nın barəsində etmiş olduğu şikayəti ilə bağlı gəldiklərini söyləmişlər. A. da sonradan polis əməkdaşalrı ilə birlikdə qayıdıb otağa gəlmişdir. Polis əməkdaşalrı ondan A.-dan pul alıb-almadığını soruşduqda, o, həqiqətən bir qədər əvvəl A.-dan 1400 avro aldığını etiraf etmiş və otağındakı oturduğu stolun sağ tərəfindəki şkafın yuxarıdan ikinci siyirtməsindən 14 ədəd 100-lük avro pul əsginazlarını götürüb polis əməkdaşlarına təqdim etmişdir. Polis əməkdaşları müvafiq protokol tərtib etməklə təqdim etdiyi 14 ədəd 100-lük Avro pulları kağız zərfdə qablaşdırıb götürmüşlər. Bu barədə protokol tərtib edilmiş, protokol oxunmuş, məzmunu ilə tanış olduqdan sonra doğruluğunu imzalarla təsdiq etmişlər.

Cinayət işi üzrə şahid qismində dindirilmiş Azərbaycan Respublikası Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşı Əlimərdanov Kərim Heydər oğlu ifadəsində göstərmişdir ki, 10 aprel 2014-cü il tarixdə A. adlı vətəndaş Baş Mütəşəkkil Cinayətkarlıqla Mübarizə İdarəsinə şikayət ərizəsi ilə müraciət edərək, Bakı şəhəri, Nərimanov rayonu ərazisində fəaliyyət göstərən “İlhaMed” tibb mərkəzində psixoloq işləyən İlham Mirzəyevin qəbulunda olarkən, İlham Mirzəyevin ona xoşuna gələn oğlanla münasibətlərində şirinlik yaradacağına, onları bir-birilərinə qovuşduracağına, nəticədə, evlənəcəklərinə söz verdiyini və bu işin həlli üçün ondan 3000 Avro pul istədiyini, 09 aprel 2014-cü il tarixdə bu məqsədlə həmin tibb mərkəzinə gedərək İlham Mirzəyevə 1600 avro pul və iki ədəd fotoşəkillərini verdiyini, İlham Mirzəyevin 3000 Avro pulu sabahı gün, yəni 10 aprel 2014-cü il tarixdə çatdırılmasını söylədiyini, lakin sonradan İlham Mirzəyevin onu yalandan aldadaraq pulunu ələ keçirməsini başa düşdüyünü bildirmiş və İlham Mirzəyev barəsində qanuni tədbir görülməsini xahiş etmişdir. Həmin tarixdə o, vətəndaş A.-nın müraciətinə əsasən məlumatın yoxlanılması məqsədilə əməliyyat-axtarış tədbirinin keçirilməsi ilə bağlı raprotla BMCMİ-nin rəisinə məruzə etmiş və rəhbərlik tərəfindən əməliyyatın keçirilməsinə dair qərar qəbul etmişdir.

“İlhaMed” tibb mərkəzinin direktoru İlham Mirzəyevin cinayət əməlinin ifşa edilməsi məqsədi ilə ərizəçi A. tərəifndən ona verilməsi üçün hal şahidlərinin iştirakı ilə A.-nın şəxsi vəsaitindən olan 14 ədəd 100-lük avro pul əsginazları seriya və nömrələri yazılmaqla və kserosurətləri çıxardaraq A.-ya verilmişdir. Ərizəçi A.-ya əməliyyat-axtarış tədbirinin planına uyğun necə hərəkət edəcəyi izah olunmuş, bundan sonra, həmin gün, yəni 10 aprel 2014-cü il tarixdə saat 15:30-da əməliyyat qrupunun üzvləri, dəvət olunmuş hal ş\ahidləri və ərizəçi A. ilə birlikdə Bakı şəhəri, Nərimanov rayonu, İbrahimpaşa Dadaşov küçəsi 57 ünvanında fəaliyyət göstərən “İlhaMed” tibb mərkəzinin qarşısına gəlmişlər. Əməliyyat planına uyğun olaraq A. “İlhaMed” tibb mərkəzinə daxil olub girişlə üzbəüz yerləşən mərkəzin direktoru İlham Mirzəyevin otağına keçmişlər. Ərizəçi A.-nın deməsinə görə, İlham Mirzəyev ondan qalan 1400 avro pulu həmin gün çatdırılmasını istəmişdir. Təxminən 8-10 dəqiqə sonra A. tibb mərkəzinin direktoru İlham Mİrzəyevin otağından bayıra çıxmış və kənardan dayanıb müşahidə aparan əməliyyat qrupunun üzvlərinə artıq əvvəlcədən seriya və nömrələri yazılmaqla əməliyyat tədbirində istifadə edilməsi məqsədilə ona təqdim olunmuş pulları İlham Mirzəyevə verməsi şərti işarə ilə xəbər vermişdir.

“Əməliyyatçılar otağa daxil olduqda tibb mərkəzinin direktoru İlham Mirzəyev içəridə tək olub”

Bundan sonra əməliyyat qrupunun üzvləri dəvət olunmuş hal şahidləri ilə ərizçi A.-nın iştirakı ilə “İlhaMed” tibb mərkəzindəki əsas girişlə üzbəüz yerləşən mərkəzin direktoru İlham Mirzəyevin iş otağına daxil olmuşlar. Otağın giriş qapısının kənarında “Direktor İ.Mirzəyev” yazılı lövhə vurulmuşdur. Otağa daxil olduqda tibb mərkəzinin direktoru İlham Mirzəyev içəridə tək olmuşdur. Əməliyyat qrupunun üzvləri xidməti vəsiqələrini göstərib özlərini təqdim etmiş və İlham Mirzəyevi əməliyyat-axtarış tədbirinin keçirilməsi haqqında qərarla tanış etmişlər.

Sonra tibb mərkəzinin direktoru İlham Mirzəyevə vətəndaş A.-nın onun barəsində Azərbaycan Respublikası Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə ünvanladığı şikayət ərizəsi əsasında əməliyyat tədbirinin keçirilməsi barədə məlumat verilmiş və ondan A.-nın ona müraciət edib-etmədiyini, bu vətəndaşlardan hansısa məbləğdə pul alıb-almadığını şifahi soruşmuş və ona təklif etmişlər ki, əgər A. ona hansısa məbləğdə pul vəsaiti vermişdirsə, həmin pulları təqdim etsin. İlham Mirzəyev əməliyyat-axtarış tədbirinin keçirilməsi haqqında qərarla tanış olub təkliflərini dinlədikdən sonra bildirmişdir ki, bəli, həqiqətən də, A.-nı tanıyır, bu xanım əvvəllər 2-3 dəfə “İlhaMed” tibb mərkəzinə gəlmişdir və A. şəxsən onun özünə psixoloji yardım üçün müraciət etmişdir. İlham Mirzəyev bildirmişdir ki, əvvəlki dəfələrdə A. onun qəbulunda olarkən göstərdiyi psixoloji yardıma görə hər dəfə direktoru olduğu tibb mərkəzinə 50 manat pul ödəmiş, həmin gün də, növbəti dəfə A. onun qəbuluna gəlmiş və bir qədər əvvəl iş otağında A. gələcəkdə göstərəcəyi psixoloji yardım xidmətinə görə ona 1400 avro pul vermişdir. Təkliflərinə əsasən İlham Mirzəey iş otağında əyləşdiyi stolun sağ tərəfindəki dördgözlü siyirtmə şkafın yuxarıdan ikinci gözünü açaraq oradan 14 ədəd 100-lük avro pul əsginazlarından ibarət cəmi 1400 avro məbləğində pulları təqdim etmiş və bildirmişdir ki, bu pullar bir qədər əvvəl A.-nın ona vernmiş olduğu pullardır. İlham Mirzəyevin iş otağında təqdim etdiyi 14 ədəd 100-lük avro pul əsginazlarına baxış keçirən sənədləşmə aparılmaqla A.-ya təqdim olunmuş şəxsi vəsaitindən olan 14 ədəd 100-lük avro pul əsginazlarının seriya və nömrələri ilə eyniyyət təşkil etdiyi müəyyən edilmişdir. İlham Mirzəyevin təqdim etdiyi 14 ədəd 100-lük avro pul əsginazları onun özünün dəvət olunmuş hal şahidlərinin və ərizəçi A.-nın iştirakları ilə kağız zərfdə qablaşdırılaraq üzəri möhürlənməklə götürülmüş, əməliyyat tədbiri zamanı fotoçəkilişi aparılmışdır. Sonra ounun tərəfindən əməliyyat-axtarış tədbirinin keçirilməsi və maddi sübutun götürülməsi haqqında protokol tərtib olunmuşdur. Protokol iştirakçılara ucadan oxunmuş, iştirakçılar tərəfindən heç bir şikayət, təklif daxil olmamış və sonda bütün iştirakçılar, o cümlədən İlham Mirzəyevin özü protokolun doğruluğunu imzalarla təsdiq etmişlər.

“Hadisə yerinin mühafizəsinin təmin edilməsi üçün tibb mərkəzinin direktoru İlham Mirzəyevin iş otağının qapısı kilidlə bağlanıb və möhürlənib”

Əməliyyat-axtarış tədbirinin keçirilməsi və nəticələrinin rəsmiləşdirilməsi başa çatdıqdan sonra araşdırma zərurəti ilə bağlı cinayətin izlərinin, subut mənbəyi ola biləcək digər maddi obyektlərin və iş üçün əhəmiyyətli digər halların müəyyən edilməsi məqsədilə hadisə yerinin mühafizəsinin təmin edilməsi üçün tibb mərkəzinin direktoru İlham Mirzəyevin iş otağının qapısı kilidlə bağlanmış və möhürlənmişdir. Sonra İlham Mirzəyev araşdırma zərurəti ilə əlaqədar izahat verməsi üçün Azərbaycan Respublikası Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə gələn İlham Mirzəyev öz xətti ilə sərbəst şəkildə yazdığı izahatında göstərmişdir ki, həqiqətən də bir gün əvvəl A. ona 1600 avro pul və özünün və yaxın münasibətdə olduğu şəxsin fotoşəkillərini vermişdir. İlham Mirzəyev iki ədəd fotoşəkilləri və 1600 avro pulları təqdim edə biləcəyini izahatda göstərmişdir.

Bundan sonra hal şahidlərinin iştirakı ilə İlham Mirzəyev 2 ədəd 500-lük, 4 ədəd 100-lük və 5 ədəd 50-lik avro pul əsginazlarından ibarət cəmi 1600 avro pulları və ərizəçi A.-nın və bir nəfər kişi cinsinə mənsub şəxsin iki ədəd rəngli fotoşəkillərini təqdim edərək bildirmişdir ki, həmin pulları və iki ədəd rəngli fotoşəkilləri A. bir gün əvvəl, yəni 09 aprel 2014-cü il tarixdə sevdiyi oğlanla şirin münasibətlərini düzəltməsi üçün ona vermişdir. Sonda İham Mirzəyevin təqdim etdiyi 1600 avro pullar və iki ədəd rəngli fotoşəkillər tərəfindən ayrı-ayrı kağız zərflərdə qablaşdırılıb möhürlənərək götürülmüşdür. Bu barədə protokol tərtib olunmuş, protokol iştirakçılara ucadan oxunmuş, heç bir şikayət, təklif daxil olmamış və iştirakçılar protokolun doğruluğunu imzalarla təsdiq etmişlər.

Cinayət işi üzrə şahid qismində dindirilmiş Azərbaycan Respublikası Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları Camalov Rövşən Məhərrəm oğlu və Səfərov Emil Nizami oğlu, şahid K.H.Əlimərdanov da eyni məzmunlu ifadə vermişlər.

davamı olacaq...

tezadlar.az


Müəllif: