Bakıda poçtu yarmaq istəyən dəstə saxlanıldı

Xəzər RPİ CAŞ, PPXB və 1-ci PB-nin keçirdikləri əməliyyat tədbirləri nəticəsində, oğurluqda şübhəli bilinən Bakı şəhər sakinləri - Ceyhun Şamilov, Tərlan Hüseynov, Nicat Kərimov və qardaşı Ağabala tutulublar.

Bakı şəhər Baş Polis İdarəsinin mətbuat xidmətindən Teleqraf.com-a bildirildiyinə görə, məlum olub ki, onlar avqustun 14-də N.Hüseynov küçəsində yerləşən, Əhməd Abbasova məxsus lombarddan pul oğurlasalar da, həmin gün eyni məqsədlə daxil olduqları, Zirə qəsəbəsində yerləşən 120 saylı Poçt filialında istədiklərinə nail olmayıblar.

Bundan başqa araşdırmalar zamanı məlum olub ki, yaxalanan şəxslər iyulun 25-nə keçən gecə Zirə qəsəbəsində yerləşən yerləşən, Vüsal Məmmədliyə məxsus aptekdən, avqustun 4-də Rəfael Əliyevə və sentyabrın 6-da Mais Məmmədova məxsus mağazalardan pul oğurlayıblar.