Polisdən 3 şəhərdə və 4 rayonda əməliyyat: Həbs olunanlar var

Abşeron rayonunda narkotiklərlə bağlı əməliyyat keçirilib.

Teleqraf.com xəbər verir ki, Baş Narkotiklərlə Mübarizə İdarəsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Bakı şəhər sakinləri, əvvəllər məhkum olunmuşlar – Z.Zeynalov və V.Cəbrayılov Abşeron rayonu ərazisində saxlanılıblar.

Şəxsi axtarış zamanı Z.Zeynalovdan 3 kiloqram, V.Cəbrayılovdan isə 310 qrama yaxın heroin aşkar edilərək götürülüb.

Bundan başqa, Baş Narkotiklərlə Mübarizə İdarəsinin Cənub Bölgəsində Regional Şöbəsi əməkdaşlarının əldə edilmiş məlumat əsasında keçirdikləri əməliyyat-axtarış tədbirləri nəticəsində Astara rayonunun Pensər kənd sakini İ.Rüstəmovun evindən 505 qramdan artıq heroin aşkar edilib.

Daha bir əməliyyat Quba rayonunda keçirilib.

Quba rayon polis şöbəsi əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Hacıqayıb kənd sakini F.Babaxanovun həyətyanı sahəsindən kultivasiya yolu ilə yetişdirilmiş 20 ədəd çətənə kolu aşkar edilərək götürülüb.

Oxşar əməliyyat Yexlax rayonunda da keçirilib.

Yevlax rayon polis şöbəsinin əməkdaşları tərəfindən Qaraməmmədli kəndi ərazisində yabanı halda bitmiş çəkisi 1,3 tondan artıq olan 3342 ədəd çətənə kolu aşkar edilərək məhv edilib.

Sumqayıt şəhər Polis İdarəsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Kotec qəsəbə sakini, əvvəllər məhkum olunmuş İ.Sultanov saxlanılıb.

Şəxsi axtarış zamanı ondan 485 qram marixuana aşkar edilərək götürülüb.

Gəncə şəhərində də narkotiklərlə bağlı əməliyyat keçirilib. Nəqliyyatda Baş Polis İdarəsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Gəncə şəhər sakini T.Atakişiyev saxlanılıb.

Şəxsi axtarış zamanı ondan 485 qram marixuana aşkar edilib.

Daha bir əməliyyat paytaxtın Xətai rayonunda keçirilib. Xətai rayon Polis İdarəsinin 35-ci polis bölməsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Bakı şəhər sakini N.Abdullayev saxlanılıb.

Şəxsi axtarış zamanı ondan marixuana aşkar edilərək götürülüb.

Ətrafında aparılmış tədbirlərlə onun rayon ərazisindəki yarımtikililərin birində gizlətdiyi 6 kiloqram 733 qram marixuana da aşkar edilərək götürülüb.